სასტუმრო "რედისონ ბლუ ივერიაში", ხვალ, ნიდერლანდების ინსტიტუტი მრავალპარტიული დემოკრატიისათვის (NIMD) ამომრჩეველთა საინფორმაციო ვებ-გვერდის www.partiebi.ge პრეზენტაციას გამართავს.
ვებ-გვერდზე ხელმისაწვდომი იქნება საარჩევნო სუბიექტების პროგრამები და თვითმმართველი ქალაქების მერობის კანდიდატების ხედვები ქვეყნისა და ქალაქების განვითარებასთან დაკავშირებულ მნიშვნელოვან პოლიტიკურ, სოციალურ თუ ეკონომიკურ საკითხებზე. ამომრჩეველს შესაძლებლობა ექნება გაეცნოს მისთვის საინტერესო საარჩევნო სუბიექტისა თუ მერობის კანდიდატების მოსაზრებებს და ერთმანეთს შეადაროს მათი ხედვები ამა თუ იმ საკითხზე. ვებ-გვერდი ქართულ, ინგლისურ, აზერბაიჯანულ და სომხურ ენებზე იქნება ხელმისაწვდომი.
პროექტი ჰოლანდიის მთავრობისა და ჰოლანდიის სამეფოს საელჩოს მიერ არის დაფინანსებული.
პრეზენტაციას დაესწრებიან თბილისის მერობის კანდიდატები, პარლამენტის წევრები, საერთაშორისო და ადგილობრივი ორგანიზაციების, საქართველოში აკრედიტებული საელჩოების წარმომადგენლები.
ნიდერლანდების ინსტიტუტი მრავალპარტიული დემოკრატიისათვის(NIMD) ჰოლანდიის პოლიტიკური პარტიების მიერ შექმნილი ორგანიზაციაა, რომელიც მხარს უჭერს დემოკრატიულ რეფორმებს მსოფლიოს 27 სახელმწიფოში. NIMD-ის სამხრეთ კავკასიის წარმომადგენლობა მუშაობს პოლიტიკური პარტიების
ინსტიტუციონალიზაციისა და დემოკრატიზაციის, დემოკრატიის განათლებისა და დემოკრატიული რეფორმების მხარდასაჭერად სამხრეთ კავკასიის სამივე ქვეყანაში.