არასამთავრობო ორგანიზაცია „ადამიანი, კანონი თავისუფლება" აქტიურად არის ჩართული და აკვირდება მიმდინარე წინასაარჩევნო პროცესებს. ორგანიზაციის წევრები იწყებენ პერმანენტულ შეხვედრებს მერობის კანდიდატებთან, როგორც თბილისში ისე სხვა თვითმმართველ ქალაქებში, რაც ხელს შეუწყობს კანდიდატების წინასაარჩევნო კამპანიისა და სამომავლო გეგმების უკეთ გაცნობას.
როგორც მესამე სექტორისათვის, ასევე სამოქალაქო საზოგადოებისათვის უმთავრესია გაეცნონ მერეობის კანდიდატთა პრიორიტეტებსა და სამომავლოდ განსახორციელებელ პროექტებს, თუ რას გააკეთებს კონკრეტული კანდიდატი მისი მერად არჩევის შემთხვევაში. უმნიშვნელოვანესია მოსახლეობა იყოს საფუძვლიანად ინფორმირებული თუ რა ღონისძიებების გატარებას აპირებენ მათ ქალაქებში კანდიდატები, რამდენად ხშირი იქნება ადგილობრივ მაცხოვრებლებთან შეხვედრები არჩევნების შემდეგ, რა პრობლემის მოგვარება იქნება უმთავრესი და პრიორიტეტული.
მიგვაჩნია, რომ საქართველოს მოსახლეობის სრულყოფილი ინფორმირებისათვის, აუცილებელია წინასაარჩევნო პროცესში არასამთავრობო სექტორის აქტიური მონაწილეობა. ორგანიზაცია „ადამიანი, კანონი თავისუფლება" შეხვედრებს თბილისის მერობის კანდიდატებთან მიმდინარე კვირიდან დაიწყებს, ხოლო შემდგომ შეხვედრები აღმოსავლეთ და დასავლეთ საქართველოს თვითმმართველ ქალაქებში გაგრძელდება.
ორგანიზაცია ოფიციალური წერილით მიმართავს თითოეულ რეგისტრირებულ კანდიდატს, რათა მათთვის სასურველ დროს ჩაინიშნოს აღნიშნული შეხვედრები.