ხვალ, 24 აპრილს, "კონფლიქტების და მოლაპარაკებების საერთაშორისო კვლევითი ცენტრი" ჟურნალისტებისთვის იწყებს საპილოტე პროექტს სახელწოდებით "გიორგი ხუციშვილის სახელობის კონფლიქტების მართვისა და პრევენციის სამხრეთ კავკასიური სკოლა".
პირველი ორი ეტაპისგან განსხვავებით მესამე ეტაპზე მასტერ კლასები ჩაუტარდებათ იმ ჟურნალისტებს, რომლებიც კონფლიქტების სფეროში მოღვაწეობენ და ან სამომავლოდ აპირებენ ამ თემებზე იმუშაონ.
პროექტის მიზანია, სფეროს ექსპერტებისა და დაინტერესებული ახალგაზრდებისთვის ახალი სივრცე შექმნას. გამოავლინოს სფეროში მოღვაწე ახალგაზრდა ექსპერტები, რომლებიც კვალიფიკაციის ამაღლებით არიან დაინტერესებულნი.
სკოლამ ხელი უნდა შეუწყოს, რეგიონში კონფლიქტოლოგიის, როგორც ერთ-ერთი მნიშვნელოვანი დარგის განვითარებასა პოპულარიზაციას. გამოცდილებისა და ცოდნის გაზიარებას ახალგაზრდა თაობისთვის. საპილოტე პროგრამა გულისხმობს: 7 დღიან სასწავლო კურსს 7 დღიდან თითოეული დღე მიეძღვნება ერთ ექსპერტს, და, შესაბამისად, ექსპერტის მიერ შერჩეულ საკითხს. მასტერ კლასები მიეძღვნება შემდეგ საკითხებს: ეკონომიკური უსაფრთხოება; კავკასიის კონფლიქტები; კონფლიქტების პრევენცია და დარეგულირება; ქართულ-აფხაზური სამართლებრივი ურთიერთობები. მასტერ-კლასებს ჩაატარებენ საქართველოში ცნობილი სფეროს ექსპერტები, რომელთა შესახებაც ინფორმაციას და კონკრეტული სალექციო კურსის დასახელებებს შერჩეული სტუდენტები მიიღებენ სწავლის დაწყებამდე.
ლექციებს წაიკითხავენ საქართველოში შესაბამისი სფეროს ექსპერტები: მამუკა არეშიძე, ივლიანე ხაინდრავა, ირაკლი კაკაბაძე, ლევან გერაძე, ლევან გიგინეიშვილი, ბადრი ნაჭყებია, სანდრო თვალჭრელიძე.
აღსანიშნავია, რომ 2014 წელი კონფლიქტების და მოლაპარაკებების საერთაშორისო კვლევითი ცენტრის საიუბილეო წელია და ცენტრის მიერ 2014 წელს განხორციელებული ყველა პროექტი გიორგი ხუციშვილის ხსოვნისადმი იქნება მიძღვნილი. გასაუბრების შედეგად შექმნილ ჯგუფს ყველა "საგანში" დაურიგდება (ელექტრონული სახით) ლექციისთვის მოსამზადებელი საკითხავი მასალა. კურსის ბოლოს გაიცემა სერთიფიკატი. მსმენელთა რაოდენობა ერთ კურსზე მაქსიმუმ 12 სტუდენტით განისაზღვრება.