ხვალ, 23 აპრილს, 14:00 საათზე, აშშ-ის საერთაშორისო განვითარების სააგენტოს მიერ დაფინანსებული „ჰიდროგენერაციის და ენერგეტიკის დაგეგმვის პროექტი" და საქართველოს ენერგეტიკის სამინისტრო საქართველოს ტექნიკურ უნივერსიტეტში, ადმინისტრაციული კორპუსის ნ. ნიკოლაძის სახელობის საკონფერენციო დარბაზში, აწყობენ კონფერენციას საქართველოს ენერგეტიკული სექტორის წარმომადგენლებისა და ახალგაზრდა ინჟინერბისთვის.
კონფერენციის მიზანია ხელი შეუწყოს ახალგაზრდა ინჟინრების როლის გაძლიერებას საქართველოს ენერგეტიკული სექტორის განვითარებაში და ენერგეტიკის სექტორის წარმომადგენლებისთვის ინფორმაციის დროულ მიწოდებას, რაც, თავის მხრივ, მათ შორის თანამშრომლობას შეუწყობს ხელს. წლევანდელ კონფერენციაში განსაკუთრებული ყურადღება დაეთმობა ახალგაზრდა ქალი ლიდერების ჩართულობის გაზრდას საქართველოს ენერგეტიკულ სექტორში, ასევე, საჯარო სკოლების უფროსკლასელების მონაწილკეობის ხელშეწყობას და მათ ინტენსიურ ჩართვას კონფერენციის მიმდინარეობის პროცესში.
კონფერენციას დაესწრებიან საქართველოს ენერგეტიკის სამინისტროსა და სხვა დაინტერესებული მხარეების წარმომადგენლები, ასევე, საქართველოს უნივერსიტეტების ენერგეტიკული ფაკულტეტების სტუდენტები.
