დღეს, 17 მარტს, 10:30 საათზე "თბილისის განვითარების ფონდთან" დაკავშირებით გიგი უგულავას და მასთან ერთად ბრალდებულების წინასასამართლო სხდომა გაგრძელდება.
წინა პროცესის გადადების მიზეზი მოსამართლისა და ცალკეული ადვოკატების მოუცლელობა გახდა. მათი განმარტებით, მათ სხვა პროცესები ჰქონდათ ჩანიშნული და წინასასამართლო სხდომა ამ მიზეზით გადაიდო.
პროცესის დასრულების შემდეგ გიგი უგულავამ განაცხადა, რომ მისთვის კვლავ გაურკეველი რჩება საქმეზე პროკურატურის მხრიდან მისი და მისი შვილის სატელეფონო საუბრის დართვა. უგულავამ აღნიშნა, რომ მიუხედავად პროკურორის პასუხისა, მისი, როგორც მამის შეკითხვა პასუხგაუცემელი დარჩა.
"პროკურატურამ პროცესზე ბლუყუნის დონეზე გასცა პასუხი იმას, თუ რა კავშირი აქვს ჩემს არასრულწლოვან შვილთან ჩემს საუბარს, რომლის ფარული ჩანაწერი საქმეს დაერთო. პროკურატურამ არ გაითვალისწინა არც კანონი და არც მორალი, ერთ ქვაბში ჩაყარა ყველაფერი და ახლა თევზაობენ, თუ რომელი მტკიცებულება გამოადგებათ. ყველამ დაინახა, რომ უსმენენ ყველას და ის ბრალდება, რომელზეც საქმეა აღძრული კვლავ გამოუძიებელია. 18 000 ადამიანის ხელფასების გაცემის საქმეზე 20-მდე მერიის თანამშრომელი დააკავეს და შემდეგ გაანთავისუფლეს. ამას მაშინ ხელმძღვანელობდა საგამოძიებო სამსახურში მუშაობის დროს ირაკლი შოთაძე, ასევე ფარცხალაძე. მათ ეს საქმეები გამოუძიებელი აქვთ და ამაში საკუთარ თავს ხომ არ დაადანაშაულებენ. ჩემი, როგორც მამის შეკითხვა პასუხგაუცემელი დარჩა იმასთან დაკავშირებით, თუ რა კავშირი აქვს ჩემს შვილთან სატელეფონო საუბრის ჩანაწერის საქმეზე დართვას" - განაცხადა გიგი უგულავამ.
