თბილისის საკრებულოს ,,ქართული ოცნების" უმრავლესობამ 2014 წლის ბიუჯეტი არ დაამტკიცა. ერთ-ერთი მიზეზი, რის გამოც ბიუჯეტი არ მიიღეს, თბილისის ანძის განათებისათვის გათვალისწინებული თანხა დასახელდა.
"აშკარაა, რომ ამ და სხვა ასევე ხელოვნურად გამოგონილი მიზეზებით ბიუჯეტის დაუმტკიცებლობა, მათი პოლიტიკური პოზიცია იყო, რათა პრობლემები შეექმნათ თბილისის მერიისათვის. სამწუხაროა, რომ სინამდვილეში ამით მათ პრობლემები თბილისელებს შეუქმნეს. კერძოდ, საფრთხის წინაშე დადგა სხვადასხვა პროექტების განხორციელება, მათ შორის: კომუნალური ვაუჩერის დარიგება, ოპერაციებისა და მედიკამენტების დაფინანსება, ხიდებისა და გზების რეაბილიტაცია, საცხოვრებელი შენობების გამაგრება, ახალი სპორტული მოედნებისა და სკვერების მოწყობა, შემოერთებულ სოფლებში წყალმომარაგების ქსელის მშენებლობა. იმისათვის, რომ საკრებულოს უმრავლესობას არ მივცეთ საბაბი, გაამართლონ მათი უპასუხისმგებლო პოზიცია და თბილისელებს არ შეექმნათ უამრავი სოციალური თუ სხვა სახის პრობლემა, იძულებულები ვართ აღარ ჩავრთოთ ანძის განათება, რომელიც გასული წლების განმავლობაში განახლებული თბილისის ერთ-ერთ სიმბოლოდ იქცა. მსგავსი პრაქტიკა, როგორც ჩვენ შემთხვევაში ანძის გათიშვაა, სხვა ქვეყნებშიც არსებობს. კერძოდ ეგრედწოდებული "Government Shutdown", რაც თავისი არსით ბიუჯეტის დაუმტკიცებლობის გამო გარკვეული სერვისების მიწოდების შეწყვეტას ნიშნავს. ანძის განათება და სხვა პროექტების განხორციელება, ბიუჯეტის დამტკიცებაზეა დამოკიდებული. ამიტომ თბილისელებს ვპირდებით, რომ ყველაფერს გავაკეთებთ, რათა დამტკიცდეს თბილისის ბიუჯეტი, რომელიც ქალაქის წინაშე არსებული პრობლემების მოგვარებისაკენ არის მიმართული", - ნათქვამია მერის განცხადებაში.
