სასჯელაღსრულების სამინისტროსთან არასამთავრობო ორგანიზაციების - "დროა", "აპრიორი", "საზოგადოებრივი ინიციატივა" - ორგანიზებით თეარალიზებული აქცია გაიმართა.
აქციის მონაწილეები სასჯელაღსრულების მინისტრის სოზარ სუბარის გადადგომას და ვანო მერაბიშვილის გატაცების სრულყოფილ და ობიექტურ გამოძიებას ითხოვენ. ამ მოთხოვნის საფუძველი, აქციის მონაწილეების თქმით, ყოფილი პრემიერის ვანო მერაბიშვილის განცხადების საქმეზე, მინისტრის ურთიერთგამომრიცხავი განცხადებები და ტყუილები გახდა.
აქციის მონაწილეები, უწყების შენობასთან ტრანსფარანტებით მივიდნენ წარწერით - "არ შეგრჩება", "ჩამოშორდი". მონაწილეებს ნიღბები უკეთიათ იმის ხაზგასასმელად, რომ მერაბიშვილი ნიღაბჩამოცმული გაიყვანეს საკნიდან.
ორგანიზაციები სამინისტროსთან პერმანენტული აქციების გამართვას აპირებენ.
ყოფილი პრემიერის ვანო მერაბიშვილის მტკიცებით, 2013 წლის 15 დეკემბერს, გვიან ღამით, იგი ციხიდან გაიყვანეს და მთავარ პროკურორს ოთარ ფარცხალაძეს შეახვედრეს, რომელიც თავისუფლების სანაცვლოდ მას ჟვანიას საქმეში დახმარებას და მიხეილ სააკაშვილის ანგარიშების ნომრების გადაცემა სთხოვდა.
ამის შესახებ მერაბიშვილმა სასამართლო პროცესზე 17 დეკემბერს განაცხადა. სასჯელაღსრულების სამინისტრომ საქმეზე მოკვლევა 14 იანვარს დაასრულა და შედეგად დაადგინა, რომ მერაბიშვილის განცხადებაში მოყვანილი ფაქტები სინამდვილეს არ შეეფერება.
მასალის გამოყენების პირობები