დაუბეგრავი მინიმუმის დაბრუნება 2014 წლის მეორე კვარტლიდან დაიწყება. როგორც ფინანსთა სამინისტროში განმარტავენ, ჯერ კიდევ 2013 წლის 29 მარტს
ფიზიკური პირის მიერ ხელფასის სახით მიღებული დასაბეგრი შემოსავლიდან დაუბეგრავი მინიმუმის გამოქვითვის და თანხის დაბრუნების წესი დამტკიცდა. როგორც ცნობილია „საგადასახადო კოდექსს" დაემატა 81 პრიმა მუხლი, რომელიც ითვალისწინებს დაქირავებით დასაქმებულთათვის დაუბეგრავი მინიმუმით სარგებლობას წლიური 1800 ლარის ოდენობით. კერძოდ, დაუბეგრავი მინიმუმით სარგებლობის უფლება მიენიჭა ყველა იმ ფიზიკურ პირს, რომელთა მიერ კალენდარული წლის განმავლობაში ხელფასის სახით მიღებული შემოსავალი არ აღემატება 6000 ლარს (საშუალოდ თვეში დარიცხული 500 ლარის ოდენობით) და აღნიშნული პირები კალენდარული წლის დასრულებისას უფლებამოსილნი არიან დაიბრუნონ დარიცხული და წყაროსთან დაკავებული საშემოსავლო გადასახადი არაუმეტეს 360 (1800X20%) ლარის ოდენობით. დაუბეგრავი მინიმუმის გათვალისწინებით, გადახდის წყაროსთან დაკავებული საშემოსავლო გადასახადის გადაანგარიშება და შესაბამისი თანხის დაბრუნება ხორციელდება ფიზიკური პირის მიერ (დაქირავებული) დაუბეგრავი მინიმუმის გამოქვითვის შესახებ დეკლარაციის საგადასახადო ორგანოში წარდგენით. საგადასახადო ორგანოს დეკლარაცია წარედგინება შესაბამისი კალენდარული წლის დასრულებიდან 3 თვის შემდეგ.
