რუსეთის პრეზიდენტი ვლადიმერ პუტინი უახლოეს მომავალში კომპანია „იუკოსის" ექს-ხელმძღვანელის მიხეილ ხოდორკოვსკის შეწყალებას ხელს მოაწერს. განცხადება ამის შესახებ ვლადიმერ პუტინმა დღეს მოსოკვში გამართული დიდი პრესკონფერენციის ბოლოს გააკეთა. მიხეილ ხოდორკოვსკიმ შეწყალების შესახებ თხოვნა დაწერა. იუწყება რუსული მედია.
„რაც შეეხება ხოდორკოვსკის, მე უკვე ამაზე ვისაუბრე. მიხეილ ბორისის ძეს, კანონის შესაბამისად შესაბამისი წერილი უნდა დაეწერა. ის ამას არ აკეთებდა, მაგრამ სულ ახლახანს მან ეს დაწერა და შეწყალება მთხოვა.
მან თავისუფლების აღკვეთის ადგილებში 10 წელზე მეტი გაატარა, ეს სერიოზული დასჯაა, ის ჰუმანიტარული ხასიათის გარემოებებს იშველიებს, მას ავადმყოფი დედა ჰყავს და მიმაჩნია, რომ შესაძლოა მიღებილ იქნეს გადაწყვეტილება და უახლოეს მომავალში მისი შეწყალება ხელმოწერილი იქნება", _ განაცხადა პუტინმა.
მიხეილ ხოდორკოვსკი 2003 წლის ოქტომბერში დააპატიმრეს. მას ბრალად დატაცება და გადასახადების გადაუხდელობა ედებოდა. მასთან ერთად სასამართლოს წინაშე წარსდგა მისი ბიზნეს-პარტნიორი პლატონ ლებედევი. ისინი დამნაშავედ ცნეს და 8 წლით თავისუფლების აღკვეთა მიუსაჯეს.
2006 წლის ბოლოს მიხეილ ხოდორკოვსკისა და პლატონ ლებედევის წინააღმდეგ კიდევ ერთი საქმე აღძრეს - ნავთობის დატაცების შესახებ. მათ 14 წელი მიესაჯათ. ლებედევი 2014 წლის 2 მაისს უნდა გათავისუფლდეს, მიხეილ ხოდორკოვსკი კი 2014 წლის 25 აგვისტოს.