"ნაციონალური მოძრაობიდან" ლანჩხუთის საკრებულოს წევრის კახა ასკურავას მიერ დღეს მორიგი ტყუილი გავრცელდა. სოციალური ქსელის საშუალებით მან გამოაქვეყნა 17 პირადობის მოწმობის ფოტო, რომელიც მისივე მტკიცებით "ლანჩხუთში გადაყრილი" იპოვნა და რომელიც, როგორც თავად ამტკიცებს, არჩევნების გასაყალბებლად გამოიყენეს, - ამის შესახებ დღეს გამართულ ბრიფინგზე სახელმწიფო სერვისების განვითარების სააგენტოს ხელმძღვანელმა სოსო გიორგაძემ განაცხადა.
მისი თქმით, სერვისების სააგენტოს მიერ დაუყოვნებლივ გადამოწმდა "ნაციონალური მოძრაობის" წევრის მიერ წარმოდგენილი ფოტოზე ასახული ადამიანების პირადი მონაცემები.
„ყველა ეს პირი გარდაცვლილია 2008 და 2010 წელს, ნაციონალური მოძრაობის ხანაში. ამ მოქალაქეთა მონაცემები არც სერვისების განვითარების სააგენტოს ბაზაშია აქტიური და ცხადია არც საარჩევნო სიაში აღარ არსებობს. საზოგადოების ინფორმირებისთვის სააგენტო გაცნობებთ, რომ გარდაცვალების ფაქტის დაფიქსირების შემდეგ, პირს უუქმდება პირადობის დამადასტურებელი ყველა დოკუმენტი, რაც აისახება სერვისების განვითარების სააგენტოს მონაცემთა ელექტრონულ ბაზაში. ოჯახის წევრების მიერ გარდაცვლილი პირის პირადობის დამადასტურებელი დოკუმენტის წარმოდგენის შემთხვევაში, მოწმობა ფიზიკურადაც ნადგურდება. თუმცა, პირადობის მოწმობა, იმის მიუხედავად ის განადგდება თუ არა, არის უკვე ჩვეულებრივი ქაღალდია და მას არავითარი იურიდიული ძალა აღარ გააჩნია. გაუქმებული დოკუმენტით შეუძლებელია არჩევნებში მონაწილეობის მიღება, ისევე როგორც რაიმე სახის გარიგების დადება და სხვა. სწორედ ასეთი გაუქმებული პირადობის მოწმობები წარმოადგინა დღეს ბ-ნმა ასკურავამ, რომელიც დაბარებულია პროკურატურაში და ალბათ მიტინგის გამო ვერ მივიდა ჯერ“, - განაცხადა გიორგაძემ და აღნიშნა, რომ ამავე ინფორმაციაში 17-ვე ადამიანის მონაცემია, უკვე გაუქმებული და ბაზიდან ამოღებული წლების წინ.
