თბილისის საერთაშორისო აეროპორტიდან ღამის განმავლობაში, 22-დან 8 ავიარეისი დაგვიანებით შესრულდა. დაგვიანების მიზეზად პროგრამული ხარვეზი სახელდება.
თბილისის საერთაშორისო აეროპორტის საზოგადოებასთან ურთიერთობის სამსახურის ცნობით, პრობლემა შეექმნა ელექტრონულ სარეგისტრაციო პროგრამას, თუმცა მის აღმოფხვრაზე მუშაობა უკვე მიმდინარეობს.
მათივე ინფორმაციით, დაგვიანებით შესრულდა 8 ავიარეისი, კერძოდ: ათენის, ანტალიის, ვარშავის, კიევის, დუბაის, შარჟას, ასევე სტამბოლის მიმართულებით ორი ავიარეისი.
თუმცა, როგორც ისინი განმარტავენ, არც ერთი ავიარეისი არ გაუქმებულა.
”აეროპორტში გაიხსნა ახალი ტერმინალი, მიმდინარეობს პროგრამების გადაწყობა. ამასთან, ორ ტერმინალზე ხორციელდება საოპერაციო მზაობის და შეცვლის პროცესი. ხარვეზი ნაწილობრივ სწორედ ამით იყო გამოწვეული”, - განმარტავენ აეროპორტში.
