ეს იყო და არის ალბათ უდიდესი კორუფციული ფაქტი, რაც ყოფილა საქართველოს ისტორიაში და რაზეც დღეს განაჩენია დამდგარი, - განაცხადა გენერალური პროკურორობის კანდიდატმა ირაკლი შოთაძემ პარლამენტის იურიდიულ საკითხთა კომიტეტის სხდომაზე დეპუტატის კითხვაზე საპასუხოდ თბილისის ყოფილი მერის, გიგი უგულავას საქმესთან დაკავშირებით.
„კითხვა დაისვა თბილისის ყოფილი მერის გიგი უგულავას საკითხზე, გაფლანგვის ნაწილში -„როდესაც საუბარია 50 მილიონამდე ლარის გაფლანგვაზე, საიდანაც 14 მილიონი გაიფლანგა ხელფასებზე და დანარჩენი პარტიას მოხმარდა“, ამ შემთხვევაში შემიძლია გარკვეული დაზუსტება შევიტანო, რომ 16 მილიონიც და დარჩენილი თანხაც საბოლოო ჯამში მოხმარდა ხსენებულ პარტიას, პარტიულ მიზნებს. ის ფაქტი, რომ ვიღაცებზე დამზადდა პლასტიკური ბარათები, სადაც ჩაერიცხათ 14 მილიონი, უბრალოდ იყო ამ გაფლანგვის ჩადენის ხერხი. დანარჩენი თანხა გამოტანილი იქნა პირდაპირ ბანკიდან მაღალი თანამდებობის პირების მიერ, ნაღდი ვალუტის სახით გამოტანილი იქნა „ლიბერთი ბანკიდან“ და დახარჯული იქნა პარტიული მიზნებისთვის. შესაბამისად, ეს იყო და არის ალბათ უდიდესი კორუფციული ფაქტი, რაც ყოფილა საქართველოს ისტორიაში და რაზეც დღეს განაჩენია დამდგარი“ ,- განაცხადა ირაკლი შოთაძემ.
ირაკლი შოთაძემ ისაუბრა სხვა კორუფციულ ფაქტებზეც, რომელიც, მისივე თქმით, ყოფილ მერს უკავშირდება.
„არ შეიძლება, არ გავიხსენოთ ყოფილი მერის მიერ ჩადენილი სხვა კორუფციული ფაქტები, რაზეც ასევე დადგენილია განაჩენი. შემიძლია გაგახსენოთ დასუფთავების სამსახურის თბილსერვისის საქმე, სადაც მსგავსი მეთოდით მოხდა ხუთ მილიონამდე ლარის გამოყენება პარტიული მიზნებისთვის, ასევე მინდა გაგახსენოთ „სითი პარკის“ საქმე, რომელზეც ჯერჯერობით განაჩენი არაა დამდგარი, მიმდინაროებს არსებითი განხილვა, სადაც მერიის მიერ შესაბამისი დარღვევებით ხდებოდა თანხების არამიზნობრივი ჩარიცხვა „სითი პარკისთვის“. აქ საუბარია ორ მილიონ ლარამდე“ ,- განაცხადა ირაკლი შოთაძემ.
უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა.