ქობულეთში კიდევ ერთი მაღალი დონის სასტუმროს მშენებლობა იგეგმება. ამ მიზნით, აჭარის ფინანსთა და ეკონომიკის სამინისტრო  ქობულეთში, დ. აღმაშენებლის N379-ის მიმდებარედ არსებული 11 235 კვ.მ არასასოფლო-სამეურნეო დანიშნულების მიწის ნაკვეთს პირობებიან აუქციონზე ყიდის. ობიექტის საწყისი ღირებულება 4 მლნ 585 ათასი ლარია და აუქციონი 30 დეკემბრისთვისაა ჩანიშნული.

პირობებიან აუქციონში გამარჯვებულ სუბიექტს თანხის გადახდა 2020 წლის 20 სექტემბრამდე 3 ეტაპად მოუწევს. 

ინვესტორი ვალდებულებაა ასევე, ხელშეკრულების გაფორმებიდან არაუგვიანეს 2 თვის ვადაში უპირობო და გამოუხმობი საბანკო გარანტიის წარმოდგენა 200 000 ლარის ოდენობით, რომლის ვადაც მინიმუმ 2 თვით უნდა აღემატებოდეს საინვესტიციო ვალდებულების შესრულების ვადას.

ასევე, ხელშეკრულების გაფორმებიდან 6 თვეში საპროექტო ობიექტის ვიზუალური ესკიზის წარდგენა უნდა მოხდეს, რომელსაც ზღვაზე გადასასვლელი ბილიკიც ენება.

აუქციონში გამარჯვებული სუბიექტი მინიმუმ 100 ნომერზე გათვლილი სასტუმროს გარდა სპორტულ-გამაჯანსაღებელ ან/და სარეაბილიტაციო ცენტრების მშენებლობის ვალდებულებას იღებს. საპრივატიზაციო პირობებშია ასევე რესტორნის, არანაკლებ 60 ავტომანქანაზე გათვლილი ავტოსადგომის და სკვერის მშენებლობა.
ცნობილია, რომ აუქციონში გამარჯვებულ სუბიექტთან ხელშეკრულების გაფორმებიდან 48 თვეში მრავალფუნქციური შენობანაგებობ(ებ)ის ექსპლუატაციაში მიღება უნდა მოხდეს.
პირობების თანახმად, ხელშეკრულების გაფორმებიდან 60 თვის ვადაში შენობა-ნაგებობ(ებ)ი, (რომელიც უნდა მოიცავდეს არანაკლებ 100 (ასი) ნომრიან სასტუმროს და სპორტულ-გამაჯანსაღებელ ან/და სარეაბილიტაციო ცენტრებს, ასევე რესტორანს, არანაკლებ 60 (სამოცი) ავტომანქანაზე გათვლილ ავტოსადგომს, სკვერს) უნდა ამოქმედდეს და არანაკლებ 20 წლის განმავლობაში პროფილი შეუნარჩუნდეს, სადაც დასაქმებულთა არანაკლებ 90%-ი უნდა შეადგენდეს საქართველოს მოქალაქეებს.

ინვესტორმა 60 თვის ვადაში მინიმუმ 10 მლნ ლარის ინვესტიციაც უნდა განახორციელოს.