ამ დროისთვის არსებული მონაცემებით, რუსეთის მმართველმა პარტიამ "ერთიანი რუსეთი", მოსკოვის არჩევნებში მნიშვნელოვანი მარცხი იწვნია.
მოსკოვის საქალაქო 45-ადგილიან დუმაში მმართველმა პარტიამ ადგილების თითქმის მესამედი დაკარგა, თუმცა მათ 25 მანდატით მაინც მოახერხეს უმრავლესობის შენარჩუნება.
აღსანიშნავია, რომ 2014 წლის არჩევნების შედეგად მმართველი პარტია მოსკოვის საქალაქო დუმაში 38 მანდატს განკარგავდა.
დარჩენილი 20 ადგილი კომუნისტურ პარტიას, ოპოზიციურ პარტია "იაბლოკოს", "სამართლიან რუსეთსა" და დამოუკიდებელ კანდიდატებს შორის გადანაწილდა.
გუშინ, 8 სექტემბერს, რუსეთში 15-ზე მეტ რეგიონში გაიმართა ადგილობრივი არჩევნები.
განსაკუთრებული ყურადღება მიპყრობილი იყო მოსკოვის ადგილობრივი არჩევნების მიმართ, სადაც ოპოზიციონერი კანდიდატების რეგისტრაციაზე არდაშვებამ, საპროტესტო აქციების მასშტაბური მუხტი გამოიწვია.
მოქალაქეები მთელი ივლისისა და აგვისტოს განმავლობაში (შაბათ-კვირას) მასობრივ საპროტესტო აქციებს აწყოდნენ სამართლიანი არჩევნების ჩატარების მოთხოვნით.
ფოტო: Kirill Kudryavtsev/AFP