იმ შემთხვევაში, თუ სიძულვილის ჯგუფის წევრებს დააკავებენ, ლევან ვასაძე პოლიციის "კორდონის გარღვევით" იმუქრება. ნეოფაშისტური დაჯგუფებები ლევან ვასაძის ორგანიზებით თბილისი პრაიდის წინააღმდეგ სახალხო რაზმებს ქმნიან. ამის შესახებ ვასაძემ ვერის ბაღში "ნამდვილი კაცების შეკრებაზე" განაცხადა.
"რაც ქენით კანცელარიასთან, არ გამოგივათ, არც ერთ ჩვენიანს არ გაგატანთ, დააკავებთ ერთს? ათეული გამოესარჩლება მას, არ ეყოფა ათეული? ასეული გამოესარჩლება, არ ეყოფა ასეული? ათასეული გამოესარჩლება. თუ სასწაული მოხდა და ამ ჩვენს ლომივით მეომრებს, მოჭიდავეებს, მორაგბეებს მაინც გამოსტაცეთ ერთი ჩვენიანი, თქვენს დააბრალეთ, სადაც წაიყვანთ, რომელ პოლიციის განყოფილებაშიც, იქ მოვალთ, იმ კორდონს გავარღვევთ და იქიდან გამოვიყვანთ ჩვენს ლომს" - მიმართა ვასაძემ სამართალდამცველებს.
ბიზნესმენის თქმით, "სახალხო რაზმები" იქნება მარტივი და იერარქიული. ვასაძემ იმ მოქალაქეს, რომლსაც გინება, ფურთხვა და პროვოკაციის მოწყობა აქვს განზრახული, აქციის დატოვებისკენ მოუწოდა.
"რაზმები იქნება მარტივი და იერარქიული. გვეყოლება ათეულები ათისთავებით, ათეულები შეიკრიბება ასეულებად ასისთავებით, ათი ასეული შეადგენს ათასეულს და იქნება ლეგიონი. ჩვენი მუშაობის ფორმა, სტილი და სახე იქნება მშვიდი, წყარი და აუღელვებელი. ყველას, ვისაც უნდა, რომ იგინოს, იფურთხოს, იარაღით მოაწყოს რაიმე სახის პროვოკაცია, წავიდეს აქედან, იმის ადგილი აქ არ არის.
გაინაწილებენ ქალაქს, იქნება ქალაქის პატრულირება მშვიდად, წყნარად, არავითარი იარაღი ჩვენ არ გვექნება, გარდა ერთისა - ჩვენ მათ შევუკრავთ ხელებს ქამრებით და მივაბრძანებთ იმ ადგილიდან, სადაც ისინი იქნებიან. თუ ქალაჩუნა კაცი შეგაგინებთ, ჩამოგფხოჭნით, ნუ დაარტყამთ მას ხელს, ძალიან თუ გაგაბრაზათ, ყური აუწიეთ და ამყოფინეთ" - თქვა ვასაძემ აქციაზე.