პრეზიდენტის ადმინისტრაცია საკონსტიტუციო კომისიის ძველი წესით დაკომპლექტებასთან დაკავშირებით მიღებულ გადაწყვეტილებას ეხმიანება. პრეზიდენტის მრჩეველმა ფიქრია ჩიხრაძემ განაცხადა, რომ საკონსტიტუციო ცვლილებების პროცესი უნდა ყოფილიყო მაღალი სანდოობის და მაღალი ლეგიტიმაციის მქონე.
,,ძალიან დასანანია ამავე დროს ის, რომ პარლამენტის თავმჯდომარემ, ახალგაზრდა პოლიტიკოსმა პირველი სერიოზული პოლიტიკური ნაბიჯი გადადგა არა ფართო პოლიტიკური კონტექსტის გათვალისწინებით, არამედ საკმაოდ ვიწრო პარტიული თუ ფორმალისტური მიდგომებიდან გამომდინარე, რაც ამ ძალიან მნიშვნელოვან პროცესს აზარალებს“, - განაცხადა ჩიხრაძემ.
მისივე თქმით, ოფიციალური კონსულტაციები პრეზიდენტის ადმინისტრაციასთან არ გამართულა.
„გადაწყვეტილების გამოქვეყნებამდე ჩაგვაყენეს საქმის კურსში უკვე მიღებული გადაწყვეტილების შესახებ, რასაც კონსულტაცია ვერ დაერქმევა“, - დასძინა ჩიხრაძემ.
რაც შეეხება იმას, თუ რა ფორმით ჩაერთვება პრეზიდენტის ადმინისტრაცია საკონსტიტუციო კომისიის მუშაობაში მას შემდეგ, რაც მის თანათავმჯდომარეობაზე გიორგი მარგველაშვილს პრაქტიკულად უარი ეთქვა, ფიქრია ჩიხრაძის თქმით, გადაწყვეტილება მოგვიანებით იქნება მიიღებული.
ინიცირებულ იქნა საქართველოს პარლამენტის დადგენილების პროექტი სახელმწიფო საკონსტიტუციო კომისიის შექმნის შესახებ. დადგენილების პროექტი ითვალისწინებს სახელმწიფო საკონსტიტუციო კომისიის დაფუძნებას იმავე ფორმატით, როგორითაც ის შეიქმნა ზუსტად სამი წლის წინ. კომისიის თავმჯდომარე იქნება საქართველოს პარლამენტის თავმჯდომარე.