2015 არის წელი, როცა ჩვენ არა მარტო უნდა ვისაუბროთ ღირებულებებსა და ვალდებულებებზე, არამედ კონკრეტული ნაბიჯი გადავდგათ ევროკავშირში ჩვენ, ევროკავშირელებმა. ამის შესახებ საქართველოში ევროკავშირის ელჩმა, იანოშ ჰერმანმა საქართველო-მოლდოვა-უკრაინის საპარლამენტთაშორისო ფორუმზე გამოსვლისას განაცხადა.
,,როცა პარლამენტში მოვდიოდი, ვნახე ლურჯი დროშა – საქართველოში მალე ევროპული კვირა გაიმართება. ამ ღონისძიებასთან დაკავშირებით მინდა გითხრათ, რომ 2015 არის ის წელი, როცა ჩვენ არა მარტო უნდა ვისაუბროთ ღირებულებებსა და ვალდებულებებზე, არამედ კონკრეტული ნაბიჯი გადავდგათ ევროკავშირში ჩვენ, ევროკავშირელებმა და ძალზედ მნიშვნელოვანია, ეს რთული გზა ერთად გავიაროთ. ევროკავშირმა გაიარა საშინელი ფინანსური კრიზისი, ახლა ევროკავშირის ქვეყნებში მიმდინარეობს ეკონომიკის გამოჯანმრთელება, ეკონომიკური ზრდა და ეს ძალზედ მნიშვნელოვანია. აღნიშნული დაგვეხმარება, უფრო მაღალ დონეზე ავიყვანოთ ინტეგრაციის პროცესი. მნიშვნელოვანია ასევე გაძლიერდეს ევროკავშირის პოზიცია, როგორც საერთაშორისო აქტორის ეს პროცესი დაიწყო და რა თქმა უნდა, ამას ექნება გავლენა ევროკავშირის მიერ სამეზობლო პოლიტიკაზე", -
აღნიშნა ელჩმა.
მისივე თქმით, გამოწვევები სამხრეთით და უზარმაზარი გამოწვევები აღმოსავლეთით არის ძალიან მნიშვნელოვანი.
,,ჩვენი ყურადღება განსაკუთრებით უნდა გავამახვილოთ იმაზე, თუ რისი გაკეთება შეგვიძლია სწორედ ერთად აღმოსავლეთ ევროპაში, რათა გავუძლოთ იმ ზეწოლას, რომლის წინაშეც ვდგავართ და აღდგეს სტაბულურობა ამ რეგიონში", - დასძინა ევროკავშირის ელმა საქართველოში.
საქართველო-მოლდოვა-უკრაინის ორდღიანი საპარლამენტთაშორისო ფორუმი თბილისში დღეს გაიხსნა.