საქართველოს პრეზიდენტი მიხეილ სააკაშვილი საჯარო მოსამსახურეთა ნარკოლოგიური შემოწმების შესახებ საპარლამენტო უმცირესობის წევრის, დიმიტრი ლორთქიფანიძის ინიციატივას მიესალმება და მზადყოფნას გამოთქვამს მსგავს შემოწმება პირველმა თვითონ გაიაროს. ამის შესახებ პრეზიდენტმა დღეს, ჯანდაცვის მინისტრთან, ალექსანდრე კვიტაშვილთან და დიმიტრი ლორთქიფანიძესთან შეხვედრისას განაცხადა..
სააკაშვილმა ინიციატივა მოიწონა და აღნიშნა, რომ მსგავსი შემოწმება უფრო ადრე უნდა მომხდარიყო. მისი თქმით, ნარკოლოგიური შემოწმება ადამიანის თმის ღერის საშუალებით უახლესი და საუკეთესო მეთოდია.
"ყველა საჯარო მოსამსახურე, დაწყებული მაღალი თანამდებობის პირებიდან, ნარკოტიკებზე უნდა შევამოწმოთ თანამდროვე ტექნლოგიით, რომელიც არის უმტკივნეულო, არადამამცირებელი, ასევე უშეცდომო", - აღნიშნა სააკაშვილმა.
პრეზიდენტის განცხადებით, საჯარო სამსახური ნარკოტიკებისგან ერთხელ და სამუდამოდ უნდა გაიცხრილოს, ამ მიმართულებით კი თმის ღერის საშუალებით ტესტირება საუკეთესო გამოსავალია, რადგან ამ დროს შესაძლებელია, დადგინდეს არის თუ არა პირი ნარკოტიკების მომხმარებელი იმ შემთხვევაშიც, თუ მას ნარკოტიკი რამდენიმე თვეა არ მიუღია.
სააკაშვილმა ჯანდაცვის მინისტრს პირადად დაავალა, რაც შეიძლება მალე დაიწყოს ტესტირების პროცესი.
ალექსანდრე კვიტაშვილი ინიციატივით გამოვიდა და განაცხადა, რომ იმ შემთხვევაში თუ კერძო ბიზნესმენები მოინდომებენ აღნიშნული შემოწმების საკუთარ თავზე ჩატარებას, სახელმწიფო ფინანსურ ხარჯებს თავის თავზე აიღებს. მისი, თქმით კარგი იქნება თუ საზოგადოება ნარკოტიკებისგან სრულიად გაიწმინდება.
ჯერჯერობით უცნობია, საჯარო მოსამსახურეთა ნარკოლოგიური შემოწმება სავალდებულო იქნება, თუ მხოლოდ რეკომენდაციის სახე ექნება.