გარემოს დაცვის მინისტრი გოგა ხაჩიძე დღეს საერთაშორისო და არასამთავრობო ორგანიზაციებს "კოპენჰაგენის შეთანხმების ჭრილში" საქართველოს ხედვას გააცნობს.
გარემოს დაცვისა და ბუნებრივი რესურსების სამინისტროს ინფორმაციით, მინისტრი დიპლომატიური კორპუსის, არასამთავრობო და საერთაშორისო ორგანიზაციების წარმომადგენლებს სამინისტროში მიიღებს და კლიმატის ცვლილებებთან დაკავშირებით, კოპენჰაგენში ჩატარებული კონფერენციის შედეგებზე დაყრდნობით, საქართველოს ხედვას გააცნობს.
შეგახსენებთ, რომ დანიის დედაქალაქში სამიტი (COP 15) 7 დეკემბერს გაიმართა, რომელშიც საქართველოს პრეზიდენტმა მიხეილ სააკაშვილმაც მიიღო მონაწილეობა. სააკაშვილმა კლიმატის ცვლილებებთან დაკავშირებით, ქვეყნის ხედვისა და საქართველოს გარემოსდაცვითი პრობლემების შესახებ სპეციალური მოხსენებით, მსოფლიო ქვეყნის ლიდერებსა და სამიტის მონაწილე 192 ქვეყნის 15 ათასამდე დელეგატს მიმართა.
„კოპენჰაგენის შეთანხმებით" განისაზღვრა მთელი რიგი მექანიზმები, რომლებიც განვითარებული ქვეყნების მხრიდან განვითარებადი ქვეყნებისათვის ფინანსებითა და ტექნოლოგიებით ფართომასშტაბიან დახმარებას ითვალისწინებენ, რათა განვითარებადმა ქვეყნებმა ეკონომიკის განვითარება ნაკლები ემისების გამოყოფის გზით შეძლონ.