ნატოს გენერალური მდივანი ანდრეს ფოგ რასმუსენი დღეს გერმანიის კანცლერ ანგელა მერკელს შეხვდება. მათი საუბრის თემა რუსეთ-ნატოს ურთიერთობები იქნება.
როგორ ჩრდილოატლანტიკური ალიანსის შტაბ-ბინაში აცხადებენ, ეს საკითხი ოთხ დეკემბერს, ბრიუსელში დაგეგმილ რუსეთ-ნატოს საბჭოს სხდომის კონტექსტში იქნება განხილული, რომელიც საგარეო საქმეთა მინისტრების დონეზე უნდა გაიმართოს.
აღსანიშნავია, რომ ნატო-რუსეთის საბჭოს სხდომა იქნება პირველი ფორმალური შეხვედრა საგარეო საქმეთა მინისტრების დონეზე გასული წლის აგვისტოს ომის შემდეგ.
მხარეები განიხილავენ რუსეთ-ნატოს ურთიერთობის გაუმჯობესების საკითხსაც.
ამავდროულად, უნდა აღინიშნოს, რომ ჩრდილოატლანტიკური ალიანსის პოზიცია იმ შეუთავსებელ საკითხთან დაკავშირებით, რასაც ქართული ტერიტორიების ოკუპაცია წარმოადგენს, კვლავ ერთმნიშვნელოვანია.
ნატოს გენმდივანი მიიჩნევს, რომ ყველა ერს აქვს არჩევანის უფლება გაწევრიანდეს იმ საერთაშორისო სტრუქტურებში, რომლებიც მისთვის პრიორიტეტს წარმოადგენს.
ჯერ კიდევ მიმდინარე წლის ივლისში საბერძნეთში გამართული ნატო-რუსეთის საბჭოს სხდომაზე მხარეები შეთანხმდნენ უსაფრთხოების საკითხებში თანამშრომლობაზე, რომელიც აგვისტოს ომის შემდეგ შეწყვეტილი იყო, თუმცა უთანხმოების მოგვარება საქართველოს საკითხთან დაკავშირებით ვერ შესძლეს.
გასული წლის აგვისტოს შემდეგ ალიანსის წევრებმა რუსული მხარე ძალის არაპროპორციულ გამოყენებაში დაადანაშაულეს, რის გამოც რუსეთ-ნატოს საბჭოს სხდომები ყველა დონეზე შეწყდა, სანაცვლოდ კი მოსკოვმა ალიანსთან რიგი ერთობლივი პროექტები შეაჩერა.