თეირანში მეორე დღეა გრძელდება ანტისამთავრობო საპროტესო აქციები, რომლის მონაწილეები უკრაინული ავიალაინერის ჩამოგდების პასუხისმგებელ პირთა დასჯას ითხოვენ.
აქციაზე გაისმის ასევე ხელისუფლების მაღალი თანამდებობის პირთა გადადგომის მოთხოვნაც.
"ისინი იტყუებიან, როდესაც ამბობენ, რომ ამერიკა ჩვენი მტერია. ჩვენი მტერი აქ არის", - იძახდა მომიტინგეთა ჯგუფი, რომლის ამსახველი ვიდეომასალა მიკრობლოგ "ტვიტერზე" გავრცელდა.
სოციალურ ქსელში გავრცელებულ ერთ-ერთ ვიდეოში ჩანს, რომ მომიტინგეები ცდილობენ ასფატლზე დახატულ ამერიკისა და ისრაელის დროშებს ფეხი არ დააბიჯონ და ფრთხილად გადაადგილდნენ.
გამოსვლები მიმდინარეობს ირანის რამდენიმე ქალაქში, მათ შორის ისპაჰანში.
შაბათს, ასობით სტუდენტი შეიკრიბა თეირანში ამირ ქაბირის უნივერსიტეტის შენობის წინ, რათა პატივი მიეგოთ უკრაინული თვითმფრინავის კატასტროფისას დაღუპულებისთვის. შეკრება მალევე საპროტესტო აქციაში გადაიზარდა.
გუშინდელი აქცია ირანის პოლიციის მიერ იქნა დაშლილი.
გუშინ, 11 იანვარს, გამთენიისას, ირანის შეიარაღებული ძალების გენერალურმა შტაბმა აღიარა თვითმფრინავის ჩამოგდება და ამას ადამიანური შეცდომა უწოდა.
ირანის ხელისუფლება ავიაკატასტროფის პირველივე დღიდან თვითმფრინავის ჩამოგდებას ძრავის აალებას უკავშირებდა და მომხდართან ყოველგვარ კავშირს კატეგორიულად უარყოფდა.
სამგზავრო თვითმფრინავი Boeing 737, რომელიც თეირანიდან კიევს 8იანვარს მიემგზავრებოდა, თეირანში, იმამ ხომეინის საერთაშორისო აეროპორტიდან აფრენიდან 2 წუთში ჩამოვარდა.
თვითმფრინავში 167 მგზავრი და ეკიპაჟის 9 წევრი იმყოფებოდა. ყველა მათგანი დაიღუპა. მათ შორის იყვნენ უკრაინის, ირანის, ავღანეთის, კანადის, დიდი ბრიტანეთის, გერმანიისა და შვედეთის მოქალაქეები.
