შეერთებულმა შტატებმა სანქციები დააწესა იმ რვა ირანელი მაღალი თანამდებობის პირის წინააღმდეგ, რომლებიც პასუხისმგებელნი არიან ერაყში აშშ-ის სამხედრო ბაზებზე განხორციელებულ სარაკეტო იერიშებზე. ამის შესახებ აშშ-ის ხაზინის მდივანმა სტივენ მნუჩინმა ჟურნალისტებს განუცხადა.
"ჩვენ მივიღეთ ზომები რვა ირანელი მაღალჩინოსნის წინააღმდეგ, რომლებიც მონაწილეობდნენ ვითარების დესტაბილიზაციასა (რეგიონში) და სამშაბათს ბალისტიკური რაკეტებით შეტევაში", - თქვა მნუჩინმა.
სანქციები დაუწესდა ასევე 17 წამყვან ირანულ კომპანიას.
შეერთებული შტატები რომ ირანის წინააღმდეგ მძლავრ ეკონომიკურ სანქციებს დააწესებდა, ამის შესახებ თავდაპირველად პრეზიდენტმა დონალდ ტრამპმა 8 იანვარს გამართულ საგანგებო პრესკონფერენციაზე განაცხადა.
შეერთებულ შტატებს და ირანს შორის დაძაბულობის ახალი ტალღა ირანის ისლამური რევოლუციის გუშაგთა კორპუსის ერთ-ერთი მეთაურის გენერალ ყასემ სულეიმანის მკვლელობას მოჰყვა.
ყასემ სულეიმანი 3 იანვარს ბაღდადში, აშშ-ის სარაკეტი იერიშის შედეგად მოკლეს.
საპასუხოდ, ირანმა 8 იანვარს, ერაყში მდებარე ორ ამერიკულ ბაზაზე სარაკეტო შეტევა განახორციელა.
