26 ნოემბერს, თბილისის საკრებულოში, სახელდებისა და სიმბოლიკის კომისიის მორიგი სხდომა გაიმართა, რომელზეც ა(ა)იპ „თბილისის მუნიციპალიტეტის მულტიფუნქციური ბიბლიოთეკების გაერთიანების" ფილიალების სახელდების საკითხი განიხილეს.
თბილისის ბიბლიოთეკების უმრავლესობას ამჟამად მხოლოდ ნუმერაცია აქვს მინიჭებული. სახელდების საჭიროება კი ბიბლიოთეკების პოპულარიზაციისა და გადახალისების მიზნით დაიგეგმა. სახელდების სრული პროექტის საზოგადოებისთვის წარდგენა მომავალი წლის იანვარში იგეგმება, რის შემდეგაც ბიბლიოთეკებს ოფიციალურად მიანიჭებენ ახალ სახელებს.
„თბილისის ბიბლიოთეკებს უდიდესი ისტორია აქვთ და ჩვენი ქალაქის მნიშვნელოვან კულტურულ-საზოგადოებრივ ცენტრებს წარმოადგენენ. ახალი სახელწოდებების მინიჭება მათი ახალი სიცოცხლის დაწყების სიმბოლოდაც შეგვიძლია მივიჩნიოთ. გარდა ამისა, საზოგადოებას იმ ადამიანებსაც გავაცნობთ და შევახსენებთ, რომლებსაც საქართველოში წიგნიერების განვითარებაში განსაკუთრებული წვლილი აქვთ შეტანილი, თუმცა, მათ ნაწილს, ფართო საზოგადოება ნაკლებად იცნობს. აღნიშნული პროცესი იანვარში დასრულდება და ყველა ფილიალზე შესაბამისი საინფორმაციო აბრაც განთავსდება", - ამბობს თბილისის მერიის მულტიფუნქციური ბიბლიოთეკების გაერთიანების დირექტორი, ნინია მაჭარაშვილი.
ბიბლიოთეკების სახელდებასთან დაკავშირებით სარეკომენდაციო ჯგუფის პირველი სამუშაო შეხვედრა მიმდინარე წლის ივლისში გაიმართა. ახალი სახელების მინიჭებაზე იმსჯელეს როგორც თბილისის მულტიფუნქციური ბიბლიოთეკების გაერთიანებისა და თბილისის საკრებულოს წარმომადგენლებმა, ისე მოწვეულმა წევრებმა. მათ შორის იყვნენ საქართველოს გიორგი ლეონიძის სახელობის ქართული ლიტერატურის სახელმწიფო მუზეუმის დირექტორი ლაშა ბაქრაძე, საქართველოს პარლამენტის ეროვნული ბიბლიოთეკის დირექტორი გიორგი კეკელიძე, საქართველოს პარლამენტის ეროვნული ბიბლიოთეკის საბიბლიოთეკო რესურსების დეპარტამენტის დირექტორი ლევან თაქთაქიშვილი და მწერალი ნესტან ნენე კვინიკაძე.
კომისიამ სახელდებისთვის ის მწერლები და საზოგადო მოღვაწეები შეარჩია, რომლებსაც ქართული ლიტერატურისა და წიგნიერების განვითარებაში დიდი წვლილი აქვთ შეტანილი, ზოგი მათგანი კი ფართო საზოგადოებისთვის შედარებით უცნობია. მათ შორის არიან: ძმები ზუბალაშვილები, ეკატერინე თამამშევა, მარო მაყაშვილი, მარიამ დემურია, ოლღა გურამიშვილი, აკაკი შანიძე, შალვა ნუცუბიძე, ტერენტი გრანელი, ანასტასია თუმანიშვილი-წერეთელი, იაკობ მანსვეტაშვილი, ოთარ ჭილაძე, მერაბ მამარდაშვილი, გიორგი ყაზბეგი და სხვები.
