2019 წელს ექსპორტი მხოლოდ მაისსა და ივნისში განხორციელდა. 8 თვის მონაცემებით, ელექტროენერგიის ექსპორტი განახევრდა (-59.1% წ/წ) და ჯამური მიწოდების მხოლოდ 2.6% შეადგინა (2018 წლის 6.3%-თან შედარებით). აღნიშნული სრულად ანპირობებულია ადგილობრივ ბაზარზე არსებული დეფიციტით, რაც წლიდან წლამდე ღრმავდება მოხმარების გენერაციაზე უფრო სწრაფი ტემპით ზრდის გამო. აღსანიშნავია, რომ 2019 წლის ივლისში პირველად განხორციელდა ელექტროენერგიის იმპორტი, მაშინ როცა ივლისი წლების განმავლობაში საექსპორტო თვე იყო.
ექსპორტის თითქმის ნახევარი (46.9%) თურქეთის მიმართულებით განხორციელდა, ხოლო ექსპორტიორები იყვნენ: „საქართველო - ურბან ენერჯი“ და „აჭარ ენერჯი - 2007“, რომლებიც ექსპორტს გრძელვადიანი გადაცემა-დისპეტჩერიზაციის (TDA) კონტრაქტის ფარგლებში ახორციელებენ; მესამე ექსპორტიორი იყო აგრეთვე ბახვი ჰიდრო პაუერი.
სომხეთის მიმართულებით ექსპორტს ძირითადად „საქართველოს საერთაშორისო ენერგეტიკული კორპორაცია“ ახორციელებდა, ხოლო რუსეთისა და აზერბაიჯანის მიმართულებით ესკო ერთადერთი ექსპორტიორი იყო.
ექსპორტირებული ელექტროენერგიის საშუალო ფასი წლიურად 15.7%-ით გაიზარდა, 2019 წლის 8 თვეში. ზრდა განპირობებული იყო ექსპორტის დივერსიფიკაციით და უფრო ძვირადღირებული საექსპორტო ბაზრების წილის ზრდით. საშუალო ფასის ზრდის მიუხედავად, 2019 წლის შემცირებული საექსპორტო მოცულობიდან გამომდინარე, ექსპორტიდან მიღებული შემოსავალები განახევრდა (-52.7% წ/წ) და მხოლოდ 9.0 მლნ აშშ
დოლარი შეადგინა.
ელექტროენერგიის ტრანზიტმა აზერბაიჯანიდან თურქეთის მიმართულებით 61.4 გვტ.სთ შეადგინა, 2019 წლის 8 თვეში. ეს მოცულობა თითქმის გახუთმაგდა 2018 წლის ანალოგიურ პერიოდთან შედარებით, თუმცა ბევრად ჩამორჩება 2016 და 2017 წლის ანალოგიურ მაჩვენებლებს, როდესაც ტრანზიტის ყველაზე მაღალი მოცულობები დაფიქსირდა
