რუსეთის საგარეო საქმეთა მინისტრის მოადგილემ გრიგორი კარასინმა გააკრიტიკა აშშ-ის სახელმწიფო მდივნის მაიკ პომპეოს ტონი ანაკლიის პორტთან დაკავშირებით და განაცხადა, რომ რუსეთს ეს არ მოსწონს. ინფორმაციას „რადიო თავისუფლება“ ავრცელებს.
„ჩვენ დაინტერესებული ვართ საქართველოს, მისი ეკონომიკის, სოციალური, კულტურული და სხვა სფეროების განვითარებით. საქართველომ უნდა გადაწყვიტოს, თუ რა მოუხერხოს ანაკლიის პორტს. მაგრამ რაც რუსეთისა და ჩინეთის მიმართ ითქვა, სულაც არ არის ის ტონი, რაც ჩვენ გვაწყობს“, - განაცხადა კარასინმა.
შეგახსენებთ, რომ საქართველოს პრემიერ-მინისტრის მამუკა ბახტაძის აშშ-ში ვიზიტის ფარგლებში, სახელმწიფო მდივანმა მაიკ პომპეომ განაცხადა, რომ აშშ-ს იმედი აქვს, საქართველო ანაკლიის პორტის პროექტს დაასრულებს.
შეხვედრა კარასინსა და საქართველოს პრემიერ-მინისტრის სპეციალურ წარმომადგენელს რუსეთთან ურთიერთობების საკითხებში ზურაბ აბაშიძეს შორის პრაღაში დღეს გაიმართა.
