ნენსკრაჰესის მშენებლობის შემდეგ მოსახლეობას შესაძლოა, ელექტროენერგიის გადასახადი 20 თეთრზე მეტით გაუძვირდეს. „კურიერი“ სახელმწიფოსა და ნენსკრაჰესის მშენებელ კომპანიას შორის გაფორმებული ხელშეკრულების დეტალებს ასაჯაროვებს, რომლის მიხედვით, სახელმწიფო გამომუშავებულ დენს ერთ კილოვატ საათს 12 ცენტად იყიდის, ანუ, დაახლოებით, 33 თეთრად.
კორეულ სახელმწიფო ენერგოკომპანიას, საპარტნიორო ფონდსა და საქართველოს მთავრობას შორის გაფორმებულ ხელშეკრულებაში წერია, რომ სახელმწიფო იღებს ვალდებულებას, ნენსკრაჰესის მშენებლობის შემდეგ ჰირდროელექტროსაგურისგან ერთი კილოვატი საათი ელექტრონერგია 9 ცენტად შეიძინოს, რაც იმას ნიშნავს, რომ არსებული 7.87 თეთრის ნაცვლად მხოლოდ ელექტროენერგიის გამომუშავების ფასი 25 თეთრამდე გაიზრდება.
ხელშეკრულებას, რომელიც მოსახლეობისთვის დიდი ზიანის მომტანი იქნება ხელს ენერგეტიკის მაშინდელი მინისტრი კახა კალაძე და ეკონომიკის მინისტრის მოადგილე ნათია თურნავა აწერენ.
ნენსკრაჰესის მშენებელ კომპანიასა და საქართველოს მთავრობას შორის გაფორმებული ხელშეკრულება რამდენიმე ნაწილისგან შედგება. გარემოს დამცველები, ვინც დოკუმენტი შეისწავლა, ამბობენ, რომ დოკუმენტი ქვეყნის ეროვნულ ინტერესებს აზარალებს. ხელშეკრულების თანახმად, სახელწიფო საკუთარ თავზე იღებს ვალდებულებას, ნენსკრაჰესის მფლობელებს ყველა რისკი დაუზღვიოს, მათ შორის კომპენსაცია მისცეს თუ მდინარეში წყლის დონე დაბალი იქნება და სადგური საჭირო ენერგიას ვერ გამოიმუშავებს.
მთავრობა ამტკიცებს, რომ ელექტროენერგიას იმპორტზე გაიტანს. თუმცა გაუგებარია, რომელი ქვეყანა იყიდის საქართველოსგან ორჯერ უფრო ძვირად ნენსკრაჰესის მიერ ნაწარმოებ 12 ცენტიან დენს, როდესაც ექსპორტზე ელექტროენერგიის მაქსიმალური ფასი 5 ცენტს არ აღემატება.
ხელშეკრულების მიხედვით, სახელმწიფომ პროექტი გარემოზე ზემოქმედების ანგარიშის წარდგენისგან გაათავისუფლა. ანუ 280-მეგავატიანი უზარმაზარი ჰესი ისე აშენდება, რომ კომპანია გარემოსთვის მიყენებულ ზიანზე არც კი იმსჯელებს. ზიანი კი, სპეციალისტების შეფასებით, კატასტროფული იქნება.
