2018 წელს სახელმწიფო აუდიტის სამსახურმა 90 აუდიტი ჩაატარა და ჯამურად 11 მლრდ ლარი დაფარა, რაც ქვეყნის ნაერთი ბიუჯეტის 85%-ს შეადგენს.
"მიუხედავად იმისა, რომ 2017 წელთან შედარებით შემცირდა ფინანსური აუდიტების რაოდენობა, რაც გამოწვეული იყოს მთავრობის სტრუქტურაში განხორციელებული ცვლილებებით (სამინისტროების გაერთიანებით), 4%-ით გაიზარდა ბიუჯეტის დაფარვის მაჩვენებელი. 2018 წელს ჩატარდა 25 ფინანსური, 53 შესაბამისობის და 12 ეფექტიანობის აუდიტი", აღნიშნულია სახელმწიფო აუდიტის სამსახურის 2018 წლის საქმიანობის ანგარიშში, რომელიც უწყებამ პარლამენტს უკვე გადაუგზავნა.
როგორც ირკვევა, 2018 წელს ჩატარებული აუდიტების შედეგად გამოვლენილი ხარვეზები ხშირ შემთხვევაში სისტემურია და საერთოა უწყებების უმრავლესობისათვის.
"სწორედ ამიტომ, 2018 წლიდან სახელმწიფო აუდიტის სამსახურმა დაიწყო აუდიტის ახალი მიმართულების, სისტემური (ჰორიზონტალური) აუდიტების ჩატარება, რომელიც მიზნად ისახავს საჯარო სექტორში სისტემური ხასიათის ნაკლოვანებების გამოვლენას და შესაბამისი რეკომენდაციების გაცემას. 2018 წელს სამსახურმა დაიწყო 2 სისტემური შესაბამისობის აუდიტი, რომლებიც დასრულდება 2019 წელს, კერძოდ: სახელმწიფო შესყიდვების მართვის სისტემური საკითხები; სახელმწიფო ავტოპარკის მართვისა და რეგულირების საკითხები", - აღნიშნულია ანგარიშში.
