უნგრეთის დედაქალაქში, ბუდაპეშტში, ტურისტული ბორნის მდინარე დუნაიში ჩაძირვის შედეგად სამხრეთ კორეის 7 მოქალაქე დაიღუპა. ამ დრომდე მაშველები 21 დაკარგულს ეძებენ. შემთხვევის ადგილზე მუშაობენ ექსპერტ-კრიმინალისტები.
ტურისტულ ბორანზე 30 სამხრეთ კორეელი, სამი ადგილობრივი გიდი და ორი ეკიპაჟის წევრი იმყოფებოდა, რა დროსაც მდინარეში მცურავ სხვა გემს შეეჯახა. თვითმხილველების ცნობით, ტურისტული ბორანი შეჯახებიდან 7 წამში ჩაიძირა.
მაშველებმა 7 ადამიანის გადარჩენა მოახერხეს, თუმცა 21 დაკარგულის სამძებრო სამუშაოები კვლავ აქტიურად გრძელდება.
სამაშველო ჯგუფის ხელმძღვანელის განცხადებით, სამძებრო სამუშაოებს ხელს ძლიერი წვიმა უშლის და აცხადებს, რომ მცირეა დაკარგულების პოვნის შანსი.
მდინარე დუნაიზე ბორნების მოძრაობა, როგორც წესი ძალიან აქტიურია, თუმცა უსაფრთხო. ჯერჯერობით არ სახელდება, თუ რომელი ეკიპაჟის შეცდომის შედეგად მოხდა შეჯახება.
შეჯახება, რომელსაც 7 ადამიანის სიცოცხლე ემსხვერპლა დედაქალაქის ცენტრში, პარლამენტის წინ მოხდა.
