არასამთავრობო ორგანიზაცია „საერთაშორისო გამჭვირვალობა - საქართველოს“ დაკვეთით ჩატარებულმა სოციოლოგიურმა კვლევამ უჩვენა, რომ მოსახლეობის თითქმის ნახევარი – 46% ავტომობილს ფლობს.
კვლევაში ისიც აღინიშნა, რომ ავტოტრანსპორტის მომხმარებლები საწვავის შერჩევის დროს დიდ ყურადღებას ჯერ ფასს, ხოლო შემდგომ მის ხარისხს აქცევენ.
ამასთან, კვლევის თანახმად, საწვავზე ფასის ცვლილება ძირითადად ნავთობის მსოფლიო ფასზე, ლარის გაცვლით კურსზე და აქციზის გადასახადის ცვლილებაზე იყო დამოკიდებული. ორგანიზაციის ინფორმაციით, ბოლო 5 წელიწადში ნავთობის მსოფლიო ფასი 48 პროცენტით შემცირდა, თუმცა საწვავი არ გაიაფდა იმის გამო, რომ ლარი დოლარის მიმართ 53 პროცენტით გაუფასურდა და საწვავზე აქციზის გადასახადი გაიზარდა.
კვლევაში ასევე აღნიშნულია, რო, საქართველოში მოხმარებული ნავთობპროდუქტები მთლიანად იმპორტირებულია და 2018 წელს იგი საქართველოს უმსხვილეს საიმპორტო საქონლის ჯგუფს წარმოადგენდა. 2018 წელს ქვეყანაში 864 მლნ დოლარის ნავთობი და ნავთობპროდუქტი შემოვიდა იმპორტით, რაც ჯამური იმპორტის 9.5%-ია.
ცალკე აღებული საავტომობილო ბენზინი და დიზელი 727 მლნ დოლარის (1 111 ტონა) ღირებულების იყო. რაც შეეხება საავტომობილო ბუნებრივ აირს, რადგანაც ბუნებრივი აირის იმპორტი საყოფაცხოვრებო, სამრეწველო და სატრანსპორტო დანიშნულებით ცალ-ცალკე არ აღირიცხება, სატრანსპორტო საშუალებებისათვის განკუთვნილი ბუნებრივი აირის მოცულობისა და ღირებულების შესახებ ინფორმაცია არ გვაქვს.
