რუსეთის ფედერაციის საბჭოს სენატორი ალექსეი პუშკოვის ავსტრიის საგარეო საქმეთა მინისტრის სებასტიან კურცის ინიციატივას გამოეხმაურა, რომლის თანახმადაც, საქართველოში ლტოლვილთა მიღების ცენტრები უნდა გაიხსნას.
„ ავსტიიის საგარეო საქმეთა მინისტრის წინადადებაა ლტოლვილების ევროკავშირიდან საქართველოში გააგზავნონ. როგორც ჩანს, უვიზო რეჟიმის სანაცვლოდ. საინტერესოა შეძლებს თუ არა საქართველო ევროკავშირს უარი უთხრას?“- წერს პუშკოვი Twitter-ზე.
თავდაცვის და უსაფრთხოების საკითხებში რუსეთის ფედერაციის საბჭოს თავმჯდომარის მოადგილე ფრანც კლინცევიჩის თქმით, კი საქართველოში მიგრანტების განთავსების იდეა, საერთაშორისო ტერორიზმის საფრთხის გათვალისწინებით, რუსეთის ეროვნულ ინტერესებს ეწინააღმდეგება.
„უფასო ყველი, როგორც ცნობილია, მხოლოდ სათაგურშია.. საქართველოსთან დიდი ხნის ისტორიული ურთიერთობებიდან გამომდინარე, ამ ქვეყანაში არსებული ვითარება, შეუძლებელია, არ გვაღელვებდეს. ავსტრიის საგარეო საქმეთა მინისტრის, სებასტიან კურცის წინადადება პირდაპირ ეხება რუსეთის ეროვნულ უსაფრთხოებას, რომელსაც საქართველოსთან საერთო საზღვარი გააჩნია, უპირველესად მუქარების ასპექტში, რაც საერთაშორისო ტერორიზმს უკავშირდება. ჩვენ გვახსოვს ის დრო, როდესაც საქართველოს პანკისის ხეობაში მზადდებოდნენ ტერორისტები, რომლებიც შემდეგ ჩვენთან კავკასიაში იარაღდებოდნენ“, - აცხადებს კლინცევიჩი ,,რია ნოვოსტისთან“.
ავსტრიის საგარეო საქმეთა მინისტრი ევროკავშირს ლტოლვილთა მიღების ცენტრების განთავსებას საქართველოსა და ბალკანეთის ქვეყნებში სთავაზობს. ვრცელი ინტერვიუ სებასტიან კურცმა გამოცემა bild-ს მისცა.
„ჩვენ გვჭირდება ასეთი ცენტრები ევროკავშირის ფარგლებს გარეთ, რომლებიც გაეროსთან კოორდინაციით იმუშავებენ. ისინი შეიძლება გაიხსნას საქართველოში, ეგვიპტეში ან დასავლეთ ბალკანეთის ქვეყნებში,“-აღნიშნა ავსტრიის პირველმა დიპლომატმა.
სებასტიან კურცი თებერვლის დასაწყისში საქართველოს სტუმრობდა. მან შეხვედრები ქვეყნის პირველ პირებთან გამართა.