ქრისტიან-დემოკრატების წარმომადგენელი ლევან ვეფხვაძე აცხადებს, რომ ამნისტიასთან დაკავშირებით პრეზიდენტის გადაწყვეტილება მისასალმებელია და მიიჩნევს, რომ აუცილებელია ხელისუფელბამ ნარკოტიკების მოხმარებასთან დაკავშირებით მიდგომები შეცვალოს. ეს განცხადება ვეფხვაძემ დღეს ბიუროს სხდომაზე ამნისტიის საკითხის ინიცირებისას გააკეთა.
თუმცა ვეფხვაძე აცხადებს, რომ წინასწარ უნდა გაირკვეს, რა ტიპის შემსუბუქებაზეა საუბარი.
"შარშან, როდესაც ამნისტია გამოცხადდა, მოხდა ისე, რომ ადამიანებს, რომლებსაც დარჩენილი ჰქონდათ ერთთვიანი ან ორკვირიანი სასჯელი, იმათ გაუნახევრდათ ეს ვადა და ჩვენ ამას ზარ- ზეიმით დავარქვით ამინისტია", - აცხადებს ვეფხვაძე და მიიჩნევს რომ ამ შემთხვევაში უნდა გაიმიჯნოს, ხდება სასჯელის განახევრება თუ დარჩენილი სასჯელის შემცირება.
ამნისტიის შესახებ პრეზიდენტის ინიციატივა პარლამენტში დღეს შევიდა. ინიციატივის თანახმად, ამნისტია შეეხება სისხლის სამართლის კოდექსის 273-ე მუხლის პირველ ნაწილს და 260-ე მუხლს. ამ მუხლებით მსჯავრდებულ პირებს გაუნახევრდებათ სასჯელის მოუხდელი ვადა. ბიუროს გადაწყვეტილებით, კანონპროექტს პარლამენტი პირველი მოსმენით პარასკევის სესიაზე განიხილავს. მანამდე კი სათანადო კომიტეტებმა განხილვები უნდა გამართონ.
ბაქრაძე ვეფხვაძეს ურჩევს, რომ თავისი პოზიცია საკომიტეტო და სასესიო განხილვაზე დააფიქსიროს.
