გია თვალავაძეს ჯანმრთელობასთან დაკავშირებული პრობლემა ისედაც ჰქონდა, თუმცა, პენიტენციურ დაწესებულებაში ყოფნის შედეგად, მისი მდგომარეობა კიდევ უფრო დამძიმდა. ის ჩაფიძის სახელობის კლინიკაში სამკურნალოდ გუშინწინ გადაიყვანეს, სადაც სხვადასხვა სამედიცინო ღონისძიება ჩაუტარდა, ის კვლავ საკმაოდ მძიმე მდგომარეობაში იმყოფება, - აღნიშნულის შესახებ „ჯი-ეიჩ-ენს“ ჯანდაცვის სამინისტროს სამედიცინო საქმიანობის სახელმწიფო რეგულირების სააგენტოს ყოფილი უფროსის, გია თვალავაძის ადვოკატმა, ტარიელ კაკაბაძემ განუცხადა.
ე.წ. სააფთიაქო ნარკომანიის საქმეზე სამსახურეობრივი უფლებამოსილების ბოროტად გამოყენების ბრალდებით დაკავებულ თვალავაძეს ადვოკატის განმარტებით, რამდენიმე დაავადება აქვს, რაც საპყრობილეში ყოფნისას კიდევ უფრო დამძიმდა.
„თვალავაძეს, არაერთი დაავადება და გარკვეული პრობლემები აქვს გულთან დაკავშირებით. ის საკმაოდ სერიოზულ მკურნალობას საჭიროებს. ბოლო დღეების განმავლობაში იძულებული იყო, საპყრობილეში ექიმი რამდენჯერმე გამოეძახებინა, ის პერიოდულად ცუდად ხდებოდა. პატიმრობაში ყოფნის შემდეგ, მისი ჯანმრთლოების მდგომარეობა საგრძნობლად გართულებულია“, - აცხადებს კაკაბაძე.
როგორც ის აცხადებს, თვალავაძის მიმართ გამოყენებული საპატიმრო ღონისძიება დაუსაბუთებელია. კაკაბაძის განმარტებით, მისი დაცვის ქვეშ მყოფი გამოძიებასთან თანამშრომლობდა და საქმესთან დაკავშირებით, დეტალურ ინფორმაციას აწვდიდა.
„მიგვაჩნია, რომ მის მიმართ გამოყენებული აღკვეთის ღონისძიება - პატიმრობა აბსოლუტურად დაუსაბუთებელია. რეალურად, მისი თავისუფლებაში ყოფნა არ წარმოადგენს არანაირ საფრთხეს, რომ გამოძიება ეფექტურად არ წარიმართოს. ნებისმიერი იურისტი, ვინც აღნიშნულ განჩინებას წაიკითხავს, დამეთანხმება, რომ ამ ადამიანის პატიმრობაში ყოფნის არანაირი საფუძველი არ არსებობს.
ის, თანამშრომლობდა გამოძიებასთან, მონაწილეობას იღებდა საგამოძიებო მოქმედებებში, რათა საქმეზე აბსოლუტური ჭეშმარიტება დადგენილიყო. მას მცდელობაც კი არ ჰქონია, მოწმეებზე ზემოქმედება მოხდინა, ან გამოძიებისთვის რამე ფორმით, ხელი შეეშალა. ამ ყველაფრის ფონზე, მისი პატიმრობაში დატოვება ყოველგვარ აზრს, საფუძველს მოკლებულია და პირდაპირ ეწინააღმდეგება ადამიანის უფლებათა ევროპული სასამართლოს მიერ მიღებულ არაერთ გადაწყვეტილებას“, - დასძენს კაკაბაძე.
შეგახსენებთ, რომ სააფთიაქო ნარკომანიასთან დაკავშირებით, გია თვალავაძე სუს-მა დააკავა. მას გამოძიება სამსახურეობრივი უფლებამოსილების ბოროტად გამოყენებას ედავება. თვალავაძე ბრალს არ აღიარებს.
სუს-მა ფსიქოტროპული საშუალებების ურეცეპტოდ რეალიზაციის შედეგად საერთო ჯამში 20 პირი დააკავა. მათგან, 6 პირის მიმართ თბილისის საქალაქო სასამათლომ აღკვეთის ღონისძიების სახით პატიმრობა გამოიყენა.
