განსაკუთრებულ ცინიზმს წარმოადგენდა პროკურატურის განცხადება, იმაზე კი არ აღიძრა საქმე, რომ სუბელიანს სადღაც 50 შეიარაღებული „ავტომატჩიკი“ ჰყავს, მოწმეები გატაცებული და ნაწამები არიან და ისე არის სასამართლოზე ჩვენება მიცემული, საუბარია, ვინ მიუყურადა მირზა სუბელიანს, - ამის შესახებ "ევროპული საქართველოს" ლიდერმა გიგი უგულავამ განაცხადა.
მისი თქმით, რუსთავი 2-ის მიერ გავრცელებული ჩანაწერებმა ფაქტობრივად, თავდაყირა დააყენა მთელი ამ ექვსი წლის განმავლობაში „ქართული ოცნების“ მიერ სამართლიანად მონათლული პასკვილი, რომელმაც ქვეყნის რეპუტაცია დააზიანა, გააღვივა შურისძიება და აბსოლუტურად შორს იყო კანონის უზენაესობასთან.
„პრობლემა ეს ყოფილა და არა ის, რაზეც სუბელიანი საუბრობს. ასევე ურცხვად შეგვიძლია დღეს „ოცნებისგან“ ვიხილოთ, რომ ამ ჩანაწერს, რადგან უკანონოდ არის მოპოვებული, არ აქვს სამართლებრივი ძალა. სუბელიანი შესაძლებელია, გაბუქებულად საუბრობს, თუმცა საუბრობს იმაზე, რაც არის სიმართლე და კატასტროფა, რასაც „ქართული ოცნება“ ამ ექვსი წლის განმავლობაში სჩადის. შორს ვარ ილუზიისგან, რომ ვინმე ამას გამოიძიებს, ბარონ მიუნჰაუზენივით თავის თავს ვერ ამოიტანს „ოცნება“ ჭაობიდან, ამიტომ ერთადერთი სწორი პასუხი 28 ოქტომბერს უნდა გასცეს ქართულმა საზოგადოებამ „ქართულ ოცნებასა“ და ივანიშვილს, უნდა დამარცხდეს მისი კანდიდატი და ეს ღრუბლები გაიფანტოს, სხვა შემთხვევაში, ნელა და გეგმაზომიერად მივექანებით კატასტროფისკენ“, – განაცხადა გიგი უგულავამ.
ცნობისთვის, რ2-ის მიერ გავრცელებული ჩანაწერი გლდანის #8 სასჯელაღსრულების დაწესებულებაშია გაკეთებული, რომელშიც სავარაუდოდ, პროკურატურის ყოფილი მაღალჩინოსანი, მირზა სუბელიანი საუბრობს. ჩანაწერის მიხედვით, სუბელიანთან საკანში იმყოფებიან „ქართული ოცნების“ დეპუტატი ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი დათო ცუხიშვილი.