ერთ-ერთი მთავარი მიზეზი, თუ რატომ შეიძლება არ წასულიყო გამოძიება სწორი მიმართულებით, ამ საქმეში მთავარი ფიგურანტი არის მირზა სუბელიანი, რომლის შვილის გამოც დაიწყო ეს ყველაფერი, რომლის შვილიც არის ორგანიზატორი ამ საქმის და რომლის შვილმაც შეკრიბა ეს ბავშვები, დაურეკა თავის დეიდაშვილს და სხვა პირებს, - ამის შესახებ ხორავას ქუჩაზე მოკლული დავით სარალიძის მამამ, ზაზა სარალიძემ პარლამენტში დროებითი საგამოძიებო კომისიის სხდომაზე განაცხადა.
მისი თქმით, ფაქტია, რომ რაღაც მუხლით მაინც არის დამნაშავე მირზა სუბელიანის შვილი, ეს იყოს თუნდაც ხულიგნობა ან ორგანიზატორობა. მისივე თქმთ, ამას დავუმატოთ ის, რომ საქმეში მირზა სუბელიანის ცოლის დისშვილი ერთვება.
„მაქსიმალურად ეცადა მირზა სუბელიანი, რომ სხვა გზით წასულიყო ეს გამოძიება. ბატონი გიორგი გახარია რომ მიმტკიცებს დღეს, ჩემი უწყება გამოიძიებსო, მისმა უწყებამ პირველად დაიწყო ამ საქმის გაყალბება - ფარდული არასწორ დროს დაინგრა, ასევე არ იყო ამოღებული მიხეილ კალანდიას ტანსაცმელი. ამ დროს გამოძიება შინაგან საქმეთა სამინისტროს დაქვემდებარებაში იყო.
მირზა სუბელიანის ქმედება ამ საქმეში ძალიან დიდია და ამაში ეტაპობრივად დავრწმუნდი. გამოკითხულიც კი არ არის მირზა სუბელიანი. ის 6 თვის მერე დააკავეს, თუმცა ეს აქამდეც იცოდნენ და დღეს მიმტკიცებენ, რომ სწორად გამოიძიებენ საქმეს“, - განაცხადა ზაზა სარალიძემ.
