"მიხეილ სააკაშვილი არ იყო კანონზე უზენაესი, შესაბამისად მის მიერ გამოცემული განკარგულებები იყო უკანონო", - განაცხადა ე.წ. პიჯაკების საქმის პროკურორმა, გიორგი მუჯირმა. მისი განმარტებით, ყოფილი პრეზიდენტის, მიხეილ სააკაშვილის მიერ ბიუჯეტიდან თანხები არამიზნობრივად იხარჯებოდა.
"მთავარმა აუდიტორმა დადასტურა მის მიერვე გაცემული ანგარიშის სისწორე, რომლის თანახმადაც ბრალად შერაცხული 9 მილიონი ლარის ხარჯს, არ გააჩნდა არანაირი სამართლებრივი საფუძველი და ის ცალსახად არამიზნობრივი იყო. ამასთან მინდა განვმარტო, რომ აღნიშნული ხარჯი არ უნდა გადახდილიყო არც ერთი სახელმწიფო სტრუქტურული ერთეულის მიერ. აქვე განვმარტავ, რომ პრეზიდენტის მიერ განკარგულებების გამოცემისას, რაც საფუძვლად დაედო ამ ხარჯებს, უხეშად იყო დარღვეული კანონმდებლობის მოთხოვნები, ვგულისხმობ, საბიუჯეტო კოდექსს, წლიურ საბიუჯეტო კანონს და ასევე სახელმწიფოს კანონს სახელმწიფო დაცვის სპეციალური სამსახურის შესახებ. მიხეილ სააკაშვილი არ იყო კანონზე უზენაესი, შესაბამისად მის მიერ გამოცემული განკარგულებები იყო უკანონო. მოწმის ჩვენებიდან იკვეთება კონკრეტული პირის ბრალეულობა, კერძოდ გაწეული 9 მილიონი ლარის ხარჯი მის მიერ შეფასებულია არამიზნიბრივად. აქ საუბარი გვაქვს ასევე პრეზიდენტზე, ვინაიდან მისი დავალებით ხდებოდა მსგავსი ტიპის ხარჯების გაწევა, შესაბამისად მთავარი აუდიტორის ჩვენება მიუთითებს კონკრეტული პირების მიერ დანაშაულის ჩადენაზე, მათ შორის ჯანაშიას მიერ", - აცხადებს გიორგი მუჯირი.
ცნობისთვის, მიხეილ სააკაშვილსა და თეიმურაზ ჯანაშიას, სახელმწიფო ბრალდება საბიუჯეტო თანხების დიდი ოდენობით ჯგუფურად გაფლანგვას ედავება.
