,,ევროპული საქართველოს“ წევრი ზურაბ ჭიაბერაშვილი ვიზალიბერალიზაციის შეჩერების მექანიზმის შესაძლო ამოქმედებასთან დაკავშირებით საუბრობს და აცხადებს, რომ მოქალაქეებს გაჭირვება და სიღარიბე აიძულებთ თავშესაფარი ეძებონ სხვა ქვეყნებში.
,,ჩვენს არც ერთ მოქალაქეს, არ სიამოვნებს წავიდეს თავისი ქვეყნიდან და თავშესაფარი ან სამუშაო ადგილი ეძებოს საზღვარგარეთ, მათ შორის ევროპაში. ჩვენს მოქალაქეებს აიძულებს საყოველთაო გაჭირვება და სიღარიბე , რომელიც ქვეყანაშია. თუ ,,ქართულ ოცნებას’’ და მთავრობას უნდა ,რომ ამ ხალხის ნაკადი შეაკავოს და თუ სურვილი აქვთ რომ ხალხი სამშობლოში უკან დაბრუნდეს , ქვეყანაში ეკონომიკა უნდა იზრდებოდეს, სამუშაო ადგილები უნდა იქმნებოდეს და ლარი უნდა იყოს მყარი და ფასები სტაბილური . სწორედ ის რომ მთავრობას არ შეუძლია ამ პირობების შექმნა სწორედ ამიტომ არის გაზრდილი ხალხის ნაკადის წასვლა საზღვარგერეთ,’’ - განაცხადა ზურაბ ჭიაბერაშვილმა.
,,რადიო თავისუფლების“ ჟურნალისტ რიკარდ ჟოზვიაკის მიერ twitter-ის გვერდზე გავრცელებული ინფორმაციით, „არსებობს ერთი დიდი პრობლემა. ევროკავშირის გარკვეულმა წევრებმა, მდიდარმა ქვეყნებმა დაინახეს, რომ გაიზარდა საქართველოდან თავშესაფრის მაძიებელთა რიცხვი. ეს აწუხებთ მათ, რადგან მიიჩნევენ, რომ არ უნდა გამოიყენონ ვიზალიბერალიზაცია ევროკავშირში თავშესაფრის მისაღებად. თუ ასე გაგრძელდა შესაძლოა ზოგიერთმა წევრმა თქვას, რომ ხომ არ განვიხილოთ შეჩერების მექანიზმის საკითხი. ვერ გეტყვით ვინ არიან ეს ადამიანები. შესაძლოა იყვნენ ოპოზიციის წარმომადგენლები, რომლებიც თავს უსაფრთხოდ აღარ გრძნობენ. ან შესაძლოა ის პირები იყვნენ, რომლებიც ყოფილი საბჭოთა კავშირის სხვა ქვეყნებიდან ჩამოვიდნენ საქართველოში, აიღეს საქართველოს მოქალაქეობა და იყენებენ მას ევროკავშირში თავშესაფრის მისაღებად. აშკარაა, რომ სისტემა ბოროტად გამოიყენეს და ეს ბევრ ქვეყანას აღელვებს“.
დღეს, ევროკომისიის ექსპერტთა ჯგუფი ევროპულ საბჭოს შეჩერების მექანიზმთან დაკავშირებით მოხსენებას წარუდგენს. ჟურნალისტის ინფორმაციით, სწორედ ამ მოხსენებაში გამოთქვამს უკმაყოფილებას ევროკავშირის რამდენიმე ქვეყანა აღნიშნულ საკითხზე.
