"ბრალდების მხარეს გამამტყუნებელი განაჩენის მოლოდინი ნამდვილად ჰქონდა, ვინაიდან სასამართლოში გამოკვლეული მტკიცებულებებით, გიორგი გიორგანაშვილის (ბახალას) ბრალეულობა დადასტურდა", - ამის შესახებ პროკურორმა ირინე ჩოჩიამ სასამართლო პროცესის დასრულების შემდეგ განაცხადა.
პროკურორის მტკიცებით, გამამტყუნებელი განაჩენი ორი მოწმის ჩვენებით ნამდვილად არ დამდგარა.
"გარდა პოლიციის თანამშრომლებისა, რომელთაც სამსახურებრივად ევალდებოდათ საგამოძიებო მოქმედების ჩატარება და გიორგი გიორგანაშვილის პირადი ჩხრეკა ჩაატარეს, მათ მიერ აღწერილი გარემოებები და ჩხრეკის მიმდინარეობა ნეიტრალურმა მოწმემ, ტაქსის მძღოლმა დაადასტურა. გიორგანაშვილის ჩვენება მიმართული იყო სისხლისსამართლებრივი პასუხისმგებლობისგან თავის არიდებისკენ და მისი პირადი ჩხრეკისას განსაკუთრებით დიდი ოდენობით ნარკოტიკული საშუალება აღმოაჩნდა",- განაცხადა პროკურორმა.
გიორგი გიორგანაშვილი იგივე "ბახალა" მოსამართლემ დამნაშავედ ცნო და 8 წლის ვადით თავისუფლების აღკვეთა მიუსაჯა.
მოსამართლის განმარტებით, იქიდან გამომდინარე, რომ აქამდე ნასამართლევი არაა, გიორგანაშვილს სასჯელის მინიმალური ვადა განუსაზღვრა.
"ბახალა" სასამართლო დარბაზშივე დააკავეს.
გიორგი გიორგანაშვილს ბრალი განსაკუთრებით დიდი ოდენობით ნარკოტიკის შეძენა-შენახვაში ედება.
ის 25 იანვარს დააკავეს და 14 ივლისს 20 000-ლარიანი გირაოს სანაცვლოდ გაათავისუფლეს.
