"ცხადია, ამ გადაწყვეტილებას გავასაჩივრებთ, თუმცა ამ ყველაფერს ძალიან დიდი იმედგაცრუება ახლავს", - ამის შესახებ გიორგი გიორგანაშვილის - "ბახალას" ადვოკატმა, გიორგი მახარაძემ მას შემდეგ განაცხადა, რაც მისი დაცვის ქვეშ მყოფი სასამართლომ დამნაშავედ ცნო და 8 წლით თვისუფლების აღკვეთა მიუსაჯა.
"ობიექტურად, არ არსებობდა მტკიცებულებების ერთობლიობა, რომელიც მიუთითებდა იმას, რომ გიორგი გიორგანაშვილმა ბრალად შერაცხული ქმედება ჩაიდინა. ნებისმიერ ინსტანციაში ვეცდებით ჩვენი სიმართლის დამტკიცებას, საუბარია 2 პოლიციელის ჩვენებაზე, რომლებიც ჩხრეკაში იღებდნენ მონაწილეობას და ასევე ტაქსის მძღოლის ნეიტრალურ ჩვენებაზეა , რომელმაც დაადასტურა სასამართლო სხდომაზე, რომ მას არ დაუნახავს , რომელიმე პოლიციელს ამოეღოს გიორგი გიორგანაშვილისგან რაიმე კანონსაწინააღმდეგო ნივთიერება", - განაცხადა ადვოკატმა.
გიორგი გიორგანაშვილი იგივე "ბახალა" დღეს, 23 იანვარს, მოსამართლემ დამნაშავედ ცნო და 8 წლის ვადით თავისუფლების აღკვეთა მიუსაჯა.
მოსამართლის განმარტებით, იქიდან გამომდინარე, რომ აქამდე ნასამართლევი არაა, გიორგანაშვილს სასჯელის მინიმალური ვადა განუსაზღვრა.
"ბახალა" სასამართლო დარბაზშივე დააკავეს.
გიორგი გიორგანაშვილი 25 იანვარს დააკავეს და 14 ივლისს 20 000-ლარიანი გირაოს სანაცვლოდ გაათავისუფლეს.
მას ბრალი განსაკუთრებით დიდი ოდენობით ნარკოტიკის შეძენა-შენახვაში ედება.