გიორგი გიორგანაშვილის, იგივე ბახალას ადვოკატის, გიორგი მახარაძის განცხადებით, ერთადერთი სამართლიანი გადაწყვეტილება მისი დაცვის ქვეშ მყოფის უდანაშაულოდ ცნობა იქნება.
ადვოკატის მტკიცებით, შეკრებილი მტკიცებულებები გონივრულ ეჭვს მიღმა სტანდარტით, ვერ ადასტურებს ბრალდებულის მიერ დანაშაულის ჩადენას.
„დღეს გიორგი გიორგანაშვილი საბოლოო სიტყვის უფლებით ისარგებლებს. მოლოდინი გვაქვს, რომ შესაძლებელია, მოსამართლემ განაჩენი დღესაც გამოიტანოს და ერთადერთი სამართლიანი გადაწყვეტილება, მისი დაცვის ქვეშ მყოფის უდანაშაულოდ ცნობა იქნება, ვინაიდან შეკრებილი მტკიცებულებები გონივრულ ეჭვს მიღმა სტანდარტით, ვერ ადასტურებს მის მიერ დანაშაულის ჩადენას. არ არსებობს ობიექტური მტკიცებულება, ეს იქნება ვიდეოჩანაწერი თუ ბიოლოგიური ან გენეტიკური ექსპერტიზის დასკვნა, რომ მას ნამდვილად ჰქონდა მისგან ამოღებული ნივთიერება, ასევე, გვაქვს ტაქსის მძღოლის ჩვენება, რომელმაც ერთმნიშვნელოვნად დაადასტურა, რომ მას არ დაუნახავს , რომელიმე პოლიციელს ამოეღოს გიორგი გიორგანაშვილისგან რაიმე კანონსაწინააღმდეგო ნივთიერება“, - განაცხადა ადვოკატმა გიორგი გიორგანაშვილის სასამართლო პროცესის განახლებამდე.
რაც შეეხება ბრალდების მხარეს, პროკურორმა პროცესის დაწყებამდე მხოლოდ ის განაცხადა, რომ გამამტყუნებელი განაჩენის მოლოდინშია.
„ბახალას“ სასამართლო პროცესი 15:00 საათზეა ჩანიშნული. დღევანდელ პროცესზე ის საბოლოო სიტყვას წარმოთქვამს.
გიორგი გიორგანაშვილი 25 იანვარს დააკავეს და 14 ივლისს 20 000-ლარიანი გირაოს სანაცვლოდ გაათავისუფლეს. მსახიობს პროკურატურა განსაკუთრებით დიდი ოდენობით ნარკოტიკის შეძენა-შენახვას ედავება. მას 8-დან 20 წლამდე პატიმრობა ემუქრება.
