ნინოწმინდის რაიონის სოფელ ყაურმაში მოკული 70 წლამდე ქალი ამავე სოფლის საჯარო სკოლის დირექტორი იყო, - ამის შესახებ „ჯი-ეიჩ-ენს“ ნინოწმინდის გამგეობის უფროსმა სპეციალისტმა, რომან მიკირტიჩიანმა განუცხადა.
„შემთხვევა 27 ივნისს, 15 საათზე მოხდა. როგორც ვიცი, იმ დროს, ცოლ-ქმარი სახლში მარტო იმყოფებოდა. ალბათ, იჩხუბეს, ოჯახური პრობლემა, კონფლიქტი იქნებოდა, ზუსტი მიზეზი არავინ იცის. როგორც ვიცი, ისინი მკვლელობამდეც ხშირად კამათობდნენ. როცა სასწრაფო დახმარების ბრიგადა მოვიდა, ქალბატონი უკვე გარდაცვლილი იყო. ის დანითაა მოკლული.
შემკვლელობაში ბრალდებული მამაკაცი დაკავებულია, ის პოლიციას თავის ნებით ჩაბარდა. დაახლოებით, 50 წლის ცოლ-ქმარი იყვნენ. მოკლულის ქმარი პენსიონერი იყო, გარდაცვლილი კი სოფელ ყაურმის საჯარო სკოლის დირექტორი. გარდაცვლილს 2 შვილი დარჩა“, - აცხადებს „ჯი-ეიჩ-ენ“ -თან საუბარში რომან მიკირტიჩიანი.
როგორც ცნობილია, მკვლელობაში ბრალდებული მამაკაცი 71 წლისაა. მან ცოლს ჭრილობა ყელის არეში ცივი იარაღით მიაყენა. გამოძიება სისხლის სამართლის კოდექსის 11 პრიმა 108-ე მუხლით მიმდინარეობს, რაც ოჯახში ჩადენილ განზრახ მკვლელობას გულისხმობს.
