საქართველოს პრეზიდენტი გიორგი მარგველაშვილი მანჩესტერში მომხდარ ტერაქტს გამოეხმაურა. მან მწუხარება გამოთქვა მომხდარის გამო და დაღუპულთა ახლობლებს მიუსამძიმრა.
"შეძრწუნებული ვარ დიდ ბრიტანეთში, ქალაქ მანჩესტერში განხორციელებული ტერორისტული აქტის გამო, რომელსაც მსხვერპლი მოჰყვა.
საქართველოს ხელისუფლება და ხალხი ცალსახად გმობს ტერორიზმის ნებისმიერ გამოვლინებას. ჩვენ, საერთაშორისო თანამეგობრობასთან ერთად ვაგრძელებთ ბრძოლას თანამედროვეობის ამ უდიდესი საფრთხის წინააღმდეგ.
ამ განსაცდელის ჟამს ქართველი ხალხისა და პირადად ჩემი სახელით, ვუსამძიმრებ დაღუპულთა ოჯახებს, მტკიცე თანადგომას ვუცხადებ დიდი ბრიტანეთის ხელისუფლებას და ხალხს," - ნათქვამია გიორგი მარგველაშვილის მიერ გავრცელებულ განცხადებაში.
წუხელ მანჩესტერში, სპორტულ არენაზე მიმდინარე კონცერტზე ორი ძლიერი აფეთქება მოხდა. დაღუპულია 22-მდე და დაშავებულია 60-მდე ადამიანი. ბრიტანულმა პოლიციამ მომხდარს ტერაქტის კვალიფიკაცია მიანიჭა.
