თბილისის სკოლების რეკონსტრუქციისათვის 14 მლნ ევრო დაიხარჯება. აღნიშნულ საკითხზე პარლამენტის გაერთიანებული კომიტეტების სხდომაზე უკვე იმსჯელეს, სადაც საქართველოს მთავრობის მიერ წარმოდგენილი „თბილისის საჯარო სკოლების რეაბილიტაციის და ენერგოეფექტურობის გაზრდის შესახებ“ ევროპის საბჭოს განვითარების ბანკსა და საქართველოს შორის ჩარჩო სასესხო შეთანხმების რატიფიცირების საკითხი განიხილეს.
პროექტის მიზანია, თბილისის საჯარო სკოლების რეკონსტრუქცია-გამაგრება და აღნიშნულ სკოლებში ენერგოეფექტურობის ზრდა, რათა სკოლის მოსწავლეთა უსაფრთხოება და სასწავლო გარემო გაუმჯობესდეს და ენერგოეფექტურობის მნიშვნელოვანი გაუმჯობესება იყოს მიღწეული.
პროექტი მიმდინარე წელს დაიწყო და 2019 წლის 31 დეკემბერს დასრულდება. სესხის ოდენობა 14 მლნ. ევროა. სესხის ხანგრძლივობაა 20 წელი და პროექტის ფარგლებში რეაბილიტაციისთვის თბილისში 25 სკოლაა შერჩეული.
პროექტს საჯარო სამართლის იურიდიული პირი საგანმანათლებლო და სამეცნიერო ინფრასტრუქტურის განვითარების სააგენტო განახორციელებს.
