მთავრობის მიერ შემუშავებული სამთავრობო პროგრამით - „თავისუფლება, სწრაფი განვითარება და კეთილდღეობა“ და რეფორმების 4 პუნქტიანი სამოქმედო გეგმით გათვალისწინებული ღონისძიებების განხორციელების მიზნით, ცვლილებები შედის „საქართველოს 2017 წლის სახელმწიფო ბიუჯეტის შესახებ“ საქართველოს კანონის პროექტის თანმდევ რამდენიმე კანონპროექტში, რომელიც დღეს საფინანსო-საბიუჯეტო, დარგობრივი ეკონომიკისა და ეკონომიკური პოლიტიკის, ევროპასთან ინტეგრაციის და რეგიონული პოლიტიკისა და თვითმმართველობის კომიტეტების გაერთიანებულ სხდომაზე ფინანსთა მინისტრის მოადგილემ, ლაშა ხუციშვილმა წარმოადგინა.
„საქართველოს საგადასახადო კოდექსში ცვლილების შეტანის შესახებ“ კანონპროექტზე საუბრისას, ლაშა ხუციშვილმა აღნიშნა, რომ მისი მიღების მიზანი 2017 წლის სახელმწიფო ბიუჯეტის შემოსულობების ნაწილში მისაღები საგადასახადო შემოსავლების უზრუნველყოფა და საქართველოს მიერ ევროკავშირთან ასოცირების ხელშეკრულების ფარგლებში აღებული და სხვა საერთაშორისო ვალდებულებების შესრულებაა.
კანონპროექტის რამდენიმე მუხლში ცვლილება შედის. როგორც ერთ-ერთ ცვლილებასთან დაკავშირებით მინისტრის მოადგილემ აღნიშნა, პრაქტიკაში ხშირია შემთხვევა, როდესაც კომპენსაციის გადახდის ვალდებულება წინ უსწრებს თვითონ საქონლის მიწოდებას.
„ასეთ შემთხვევებში, აღწერილი ოპერაციის დამატებული ღირებულების გადასახადით დაბეგვრის მიზნებისათვის, როგორც გადასახადის გადამხდელისთვის, ასევე საგადასახადო კონტროლის განმახორციელებელი ორგანოსთვის, დასაბეგრი ოპერაციის დროის განსაზღვრა სირთულეს წარმოადგენს, რამდენადაც კომპენსაცია გადახდილია, საქონლის მიწოდება კი, მაგალითად, ერთი წლის შემდეგ განხორციელდება. ასეთ შემთხვევაში წარმოიშობა გადასახადის გადახდისაგან თავის არიდების რისკი“, - აღნიშნა ლაშა ხუციშვილმა.
მისი მოსაზრებით, დღგ-ის იურიდიული შემადგენლობის თითოეული ელემენტის მკაფიოდ დარეგულირება სახელმწიფოსთვის ერთ-ერთ არსებით ამოცანას წარმოადგენს, რამდენადაც მხოლოდ ასეთ შემთხვევაში იქნება შესაძლებელი საქონლის ან მომსახურების წარმოებისა და მიწოდების თითოეულ კომერციულ დონეზე გადასახადის მოცულობის და დაბეგვრის მომენტის სწორად განსაზღვრა და გადასახადის გადამხდელთა უფლებებისა და სახელმწიფო ბიუჯეტის ინტერესთა დაცვის უზრუნველყოფა.
სწორედ ამიტომ საგადასახადო კოდექსის 161-ე მუხლის პირველ ნაწილში ხორციელდება ცვლილება, რომლის თანახმად, დღგ-ით დასაბეგრი ოპერაციის დროდ განისაზღვრება არაუგვიანეს საკომპენსაციო თანხის წინასწარ გადახდის მომენტი, თუ თანხის გადახდა ხორციელდება საქონლის მიწოდებამდე ან მომსახურების გაწევამდე. ლაშა ხუციშვილის განცხადებით, ეკონომიკური რეფორმების განვლილი პერიოდი ადასტურებს, რომ აქციზის გადასახადს გააჩნია როგორც ფისკალური, ასევე რეგულირებადი ფუნქციაც, რადგან აღნიშნული გადასახადით, როგორც წესი, იბეგრება ისეთი ტიპის საქონელი, რომლის მოხმარების მავნე შედეგების აღმოსაფხვრელად სახელმწიფოს მნიშვნელოვანი ხარჯის გაღება უწევს.
ლაშა ხუციშვილის ინფორმაციით, კანონპროექტით იზრდება აქციზის განაკვეთი ზოგიერთ საქონელზე, რითაც ერთი მხრივ, მიღწეული იქნება ფისკალური ეფექტი და საბიუჯეტო სტაბილურობა, მეორე მხრივ, გაძლიერდება აქციზის მარეგულირებელი ფუნქცია. ლაშა ხუციშვილის მოსაზრებით, მნიშვნელოვანია, რომ აღნიშნული ცვლილება არ გამოიწვევს აღნიშნული ბიზნესსექტორის შეფერხებას და უკანონო ვაჭრობის მოცულობის ზრდას.
დეპუტატების დიდ ნაწილს მიაჩნია, რომ თამბაქოზე აქციზის განაკვეთის გაზრდა ახალგაზრდა თაობების მწეველებად ჩამოყალიბების პრევენცია იქნება. გიორგი გაჩეჩილაძის მოსაზრებით, აქციზის განაკვეთის ზრდის პარალელურად უნდა გამკაცრდეს რეგულაციები ბავშვებისთვის თამბაქოს მიყიდვასთან დაკავშირებით.
დეპუტატებს მიაჩნიათ, რომ ეკონომიკურად გაჭირვებულ ოჯახებს ავტოპარკის განახლების პროცესი მძიმე ტვირთად დააწვება, რადგან მათივე მოსაზრებით, ძველი ავტომობილების მფლობელი სწორედ მოსახლეობის ღარიბი ნაწილია.
ცვლილებები შედის „საქართველოს საბიუჯეტო კოდექსში“, რაც ლაშა ხუციშვილის განცხადებით, მდგრადი ფისკალური პოლიტიკისათვის აუცილებელი სტაბილური პარამეტრების შენარჩუნებისათვის მნიშვნელოვანია. „საჭიროა დაიხვეწოს ბიუჯეტების ხარჯვითი ნაწილის ძირითადი მიმართულებები, მათ შორის, მუნიციპალიტეტების ბიუჯეტების, რადგან ისინი გავლენას ახდენენ საქართველოს კანონმდებლობით განსაზღვრული მაკროეკონომიკური პარამეტრების ზღვრულ მოცულობებზე“ , -განაცხადა ლაშა ხუციშვილმა. ამავე მიზნით, ცვლილება შედის „ადგილობრივი თვითმმართველობის კოდექსში“.
ერთ-ერთი ცვლილება აზუსტებს, რომ საქართველოს პარლამენტი უფლებამოსილია სახელმწიფო ბიუჯეტის წლიური კანონით დააწესოს შეზღუდვები მუნიციპალიტეტების ბიუჯეტების ძირითად პარამეტრებთან მიმართებაში.
პროექტით ასევე ზუსტდება, მუნიციპალიტეტების მიერ არასამეწარმეო იურიდიული პირების შექმნის შესაძლებლობა, მხოლოდ საკუთარი უფლებამოსილებების განხორციელების მიზნებისათვის და განისაზღვრება პერიოდი 2019 წლის 1 იანვრამდე, რომლის ფარგლებშიც მუნიციპალიტეტებმა უნდა განახორციელონ მათ დაქვემდებარებაში არსებული უწყებების ოპტიმიზაცია.
ლაშა ხუციშვილის განცხადებით, მუნიციპალიტეტები ხშირ შეთხვევაში ახორციელებენ პროგრამებს ჯანმრთელობის დაცვის მიმართულებით. კოდექსში შესატანი ცვლილებით, მუნიციპალიტეტი ვალდებული იქნება ჯანდაცვის მიმართულებით დაგეგმილი ღონისძიებები შეათანხმოს საქართველოს შრომის, ჯანმრთლობისა და სოციალური დაცვის სამინისტროსთან.
კიდევ ერთ-ერთი თანმდევი კანონპროექტი „სათამაშო ბიზნესის მოსაკრებლების შესახებ’’საქართველოს კანონში ცვლილების შეტანის თაობაზე“, სათამაშო ბიზნესის სფეროში სათამაშო ბიზნესის მოსაკრებლების ოდენობის ოპტიმიზაციისა და სახელმწიფო ბიუჯეტის შემოსავლების გაზრდის მიზნით მომზადდა.
კომიტეტებმა მხარი დაუჭირეს წარმოდგენილი კანონპროექტების პლენარულ სხდომაზე გატანას.
