უფლებადამცველი ნანა კაკაბაძე მიიჩნევს, რომ ბიულეტენების 11%-ის გაუქმება ,,ნაციონალების“ სასარგებლოდ მოხდა. ნანა კაკაბაძემ არჩევნების შედეგებთან დაკავშირებით გადაცემა 2030-ში.ისაუბრა.
„როგორ მოხდა, რომ„ქართული ოცნების“ და „ნაციონალური მოძრაობის“ გარდა, ყველა სხვა პარტიის შემთხვევაში, TNS-ის ეგზიტპოლის შედეგები საბოლოო შედეგებს დაემთხვა?! როგორ მოხდა, რომ ცდომილება, თან ძალიან მაღალი პროცენტით, მხოლოდ ამ ორი პარტიის შემთხვევაში დაფიქსირდა?! როცა ვთქვი, რომ თამარ ჟვანიამ არჩევნების შედეგების გაყალბებაში მონაწილეობა მიიღო, „ნაციონალური მოძრაობა“ მას მაშინვე გადაეფარა“, - განაცხადა კაკაბაძემ.
როგორც მან აღნიშნა, საარჩევნო კომისიებში კვალიფიციური წევრები მხოლოდ „ნაციონალურ მოძრაობას“ ჰყავდა, დანარჩენი წევრები კი, სრულიად გაუგებარ მდგომარეობაში იყვნენ.
„ყველა დამკვირვებელმა თქვა, რომ კომისიები არაკვალიფიციური კადრებით იყო დაკომპლექტებული. სწორედ ამის შედეგია ის, რომ გაუქმებული ბიულეტენების რაოდენობა 11%-მდეა და ეს ბიულეტენები რამდენად სწორადაა გაუქმებული, აუცილებლად უნდა გაირკვეს, რადგან ეს ნაციონალების სასარგებლოდაა გაკეთებული და რომ გადახედილიყო, საერთო სურათი არა მათ სასარგებლოდ შეიცვლებოდა. ეს ყველაფერი მიზანმიმართულად გაკეთდა თუ როგორ, ამაზე პასუხი გამოძიებამ უნდა მოგვცეს“, - განაცხადა ნანა კაკაბაძემ.
