გიორგი პაპუაშვილი დღეს მთავარ პროკურატურაშია დაბარებული, თუმცა სასამართლოს თავმჯდომარე აცხადებს, რომ პრემიერმინისტრთან შეხვედრამდე, საგამოძიებო უწყებაში მისვლას არ გეგმავს.
გიორგი პაპუაშვილის მიერ რამდენიმე დღის წინ გავრცელებული ინფორმაციის საფუძველზე პროკურატურამ გამოძიება გუშინ სისხლის სამართლის კოდექსის ორი მუხლით დაიწყო.
საუბარია ზეგავლენის მიზნით სასამართლოს საქმიანობაში უხეშ ჩარევასა და პირადი ცხოვრების საიდუმლოს უკანონოდ მოპოვების ფაქტებზე.
პროკურატურაში დაიბარეს სასამართლოს დანარჩენი 8 მოსამართლეც. საკონსტიტუციო სასამართლოს თავმჯდომარე გამოძიების ეფექტურობას კითხვის ნიშნის ქვეშ აყენებს.
“პროკურატურამ ფაქტობრივად შტურმი განახორციელა მოსამართლეების სახლებთან და სამსახურის ადგილებთან, რომ უწყებები სასწრაფოდ ჩაბარებოდათ. ზოგჯერ სასწრაფოდ იბარებდნენ, ერთი საათით ადრე გამოცხადებულიყვნენ, არ გამოცხადების შემთხვევაში სისხლის სამართლის პასუხისმგებლობა დაგეკისრებათ და ა.შ. ეს კიდევ უფრო მეტ კითხვის ნიშნებს აჩენს იმასთან დაკავშირებით რამდენად არის სურვილი, რომ ეს საქმე არ მიიფარცხოს, არამედ იქნას გამოძიებული. ამიტომ მას შემდგომ რაც მოხდება პოლიტიკურ ხელმძღვანელობას მიერ ამგვარი პასუხისმგებლობის აღება, მერე ჩვენ გვექნება შეხვედრა მთავარ პროკურატურასთან, მთავარ პროკურორთან და იმედი მაქვს, რომ რაღაც შანსი იქნება, რომ რეალური გამოძიება მოხდეს,“-განაცხადა გიორგი პაპუაშვილმა.
