პროკურატურაში საკონსტიტუციო სასამართლოს ყველა მოსამართლე დაიბარეს. მოსამართლე მერაბ ტურავას ინფორმაციით, თავად და მისი კოლეგები საგამოძიებო უწყებაში საკონსტიტუციო სასამართლოს თავმჯდომარის განცხადების თაობაზე დაიბარეს.
რაც შეეხება თავად გიორგი პაპუაშვილს, მთავარი საგამოძიებო ორგანოდან უწყება მასაც მიუვიდა, თუმცა როგორც საკონსტიტუციო სასამართლოს თავმჯდომარე აცხადებს, მთავარ პროკურატურაში მისვლას პრემიერ-მინისტრთან შეხვედრამდე არ გეგმავს.
გიორგი პაპუაშვილი მთავარ საგამოძიებო უწყებაში ხვალ, 13:00 საათზეა დაბარებული.
საქართველოს პროკურატურამ საკონსტიტუციო სასამართლოს თავმჯდომარის გიორგი პაპუაშვილის განცხადებაში მითითებულ ფაქტებზე გამოძიება დაიწყო.
„საზოგადოებას გვინდა ვაცნობოთ, რომ მთავარი პროკურატურის საგამოძიებო ნაწილში დაიწყო გამოძიება საკონსტიტუციო სასამართლოში სამართალწარმოების განხორციელებაზე ზეგავლენის მიზნით სასამართლოს საქმიანობაში ამა თუ იმ ფორმით უხეში ჩარევის, ასევე პირადი ცხოვრების საიდუმლოს უკანონოდ მოპოვების და გამოყენების ფაქტებზე საქართველოს სისხლის სამართლის კოდექსის 364-ე მუხლის II ნაწილითა და 1571 მუხლის I ნაწილით.
პროკურატურის მიერ დაწყებული გამოძიების ფარგლებში ჩატარდება ყველა აუცილებელი საგამოძიებო მოქმედება საკონსტიტუციო სასამართლოს წევრების მიმართ შესაძლო დანაშაულებრივი ფაქტების გადამოწმების მიზნით“, - აცხადებენ მთავარ პროკურატურაში.