ქართულ ფარმაცევტულ ბაზარზე ახალი, მრავალფუნქციური და ინოვაციური საწარმო შემოდის, რომელიც აქტიური სუბსტანციების წარმოების ხარჯზე საგრძნობლად შეუწყობს ხელს რიგი მედიკამენტების გაიაფებას და, ამასთანავე, მრავალპროფილური წარმოების ხარჯზე ახალ მედიკამენტებს შესთავაზებს მომხმარებლებს.
25 ნოემბერს, ლილოს ტერიტორიაზე (იუმაშევის N23) სახელმწიფო პროგრამის „აწარმოე საქართველოში“ ფარგლებში, ეკონომიკისა და მდგრადი განვითარების სამინისტროს მეწარმეობის განვითარების სააგენტოს ფინანსური მხარდაჭერით კომპანია „ინოვასი“ ხსნის ფარმაცევტულ საწარმოს, რომელიც გამოირჩევა წარმოების მაღალი სტანდარტით, ინოვაციურობითა და წარმოებული პროდუქციის მრავალფეროვნებით. აღსანიშნავია, რომ წარმოებაში მუდმივად დასაქმდება 50-დან 140 ადამიანამდე, ხოლო მცენარეული ნედლეულის მოპოვების პროცესში რეგიონებში სეზონურად 1000 ადამიანი იქნება ჩართული წარმოების პროცესში. კომპანიის ინფორმაციით, ეს რიცხვი სხვადასხვა სეზონსა და მცენარეების მოპოვებისას 2000-მდე გაიზრდება.
კომპანია „ინოვასი“ სარგებლობს „მეწარმეობის განვითარების სააგენტოს“ ფინანსური მხარდაჭერის კომპონენტით - სააგენტო „თიბისი ბანკის“ მიერ კომპანიისთის გაცემული სესხის საპროცენტო განაკვეთის 10%-ით თანადაფინანსებას ახორციელებს პირველი 2 წლის განმავლობაში. სესხის ოდენობა 2 000 000 აშშ დოლარს შეადგენს, ხოლო ინვესტიციის რაოდენობა 9 000 000 ლარია.
აღსანიშნავია, რომ მრავალპროფილური ფარმაცევტული საწარმო ადგილობრივ მომხმარებლებს საგრძნობლად გაუადვილებს წვდომას მედიკამენტებზე და ამასთანავე, მრავალ სიახლეს დანერგავს ქართულ ბაზარზე.
როგორც კომპანიაში აცხადებენ, „ინოვასი“ პირველი ფარმაცევტული კომპანიაა ადგილობრივ ბაზარზე, რომელიც გამოიყენებს ქართული ფლორის სამკურნალო პოტენციალს და წარმოების სრულ ციკლს განახორციელებს ნედლეულის მოპოვება-გადამუშავებიდან მზა პროდუქციის ადგილობრივ და საერთაშორისო ბაზრებზე გაყიდვის ჩათვლით. საწყის ეტაპზე საწარმოში შესაძლებელი იქნება 40-მდე დასახელების მცენარის გადამუშავება და 60-მდე აქტიური ნივთიერების წარმოება.
კომპანია ასევე გეგმავს საოჯახო რეცეპტურის სერიულ წარმოებასა და კომერციალიზაციასაც, შესაბამისად, „ინოვასმა“ შესაძლებელია მომხმარებელს ბევრი სიახლე შესთავაზოს იმ მედიკამენტების კუთხით, რომელთა შესახებ საზოგადოების მცირე ნაწილისათვის იყო ცნობილი.
კომპანიის წარმომადგენლების განცხადებით, „ინოვასი“ ასევე იქნება რეგიონში პირველი კონტრაქტული მწარმოებელი, რომელიც თანამედროვე სტანდარტებით დაამზადებს აქტიურ ფარმაცევტულ ინგრედიენტებს, მათ შორის სამკურნალო მცენარეებისგან დამზადებულ ნატურალურ ექსტრაქტებს.
მნიშვნელოვანია, რომ ზემოხსენებულ საქმიანობას „ინოვასი“ განახორციელებს საერთაშორისო სტანდარტების დაცვით და ის უკვე ემზადება GMP/HASP/ISO სერტიფიცირებისთვის.
„აწარმოე საქართველოში“ პროგრამის ამ კონკრეტულ ბენეფიციარს, გამოარჩევს მისი ინოვაციურობა და დარგის განვითარებისადმი კომპლექსური მიდგომა. მნიშვნელოვანია, რომ „ინოვასი“ ზრუნავს ნარჩენი წყლების ინოვაციური მეთოდით დამუშავებაზე. პილოტური პროექტის ფარგლებში ქართველი და ლიტველი სპეციალისტების მიერ მოხდება ნარჩენი წყლების გაწმენდისას 100%-იანი ბიომეთოდის გამოყენება.
აღსანიშნავია, რომ დღეის მდგომარეობით, „აწარმოე საქართველოში“ პროგრამის ფარგლებში შექმნილ 123 საწარმოში 327 მილიონ ლარამდე ინვესტიციაა განხორციელებული და დასაქმებულთა რაოდენობა 7 000 ადამიანს აღწევს.
აქედან ეკონომიკისა და მდგრადი განვითარების სააგენტოს მეწარმეობის განვითარების სააგენტოს ხელშეწყობით შეიქმნა 72 საწარმო და განხორციელდა 180 მილიონ ლარამდე ინვესტიცია.
