„პატრიოტთა ალიანსის“ ერთ-ერთი ლიდერი ირმა ინაშვილი პარლამენტს „საარჩევნო კოდექსში“ განსახორციელებელი ცვლილებების თაობაზე საკანონმდებლო წინადადებით მიმართავს.
დღეს, ირმა ინაშვილი პარლამენტის ვიცე-სპიკერ მანანა კობახიძეს დახურულ კარს მიღმა შეხვდა, რის შემდეგაც მან განაცხადა, რომ მის მიერ მომზადებული ცვლილებებით, ადმინისტრაციული რესურსები შეიზღუდება და არჩევნებში მონაწილეობა ყველა მოქალაქისთვის სავალდებულო გახდება, წინააღმდეგ შემთხვევაში, მათ გარკვეული სახის სანქციები დაეკისრებათ.
ინაშვილი ასევე ითხოვს, რომ „პატრიოტთა ალიანს“ ცესკოში წარმომადგენლობა ჰყავდეს.
ინაშვილის ცნობით, პროექტით, ვერცერთი გამგებელი, მერი და პოლიციის უფროსი არჩევნებში პირდაპირ ჩარევას და ამომრჩეველზე ზეწოლას ვეღარ მოახერხებს.
„ჩვენ ვამბობთ, რომ ეს სისხლის სამართლის დანაშაულს უნდა გაუთანაბრდეს“, - განაცხადა ინაშვილმა.
თავის მხრივ, მანანა კობახიძემ აღნიშნა, რომ ინაშვილის მიერ წარდგენილი ცვლილებების განხილვა პარლამენტში მოხდება.
