დღეს დადგენილი ტარიფი საშუალებას მოგვცემს, რომ ზამთარი ნორმალურად, ყოველგვარი ექსცესების გარეშე გადავიტანოთ , - აცხადებს კომპანია "თელასის" კომერციული დირექტორის მოადგილე მიშა ანთაძე.თუმცა, მისივე თქმით, მომხმარებლებისთვის ტარიფი გაიზარდა, სამომხმარებლო ტარიფში კი "თელასის" განაწილების წილი შემცირდა დაახლოებით 3 თეთრით.
,,"თელასის" წილის შემცირება, კომპანიისთვის სერიოზული პრობლემაა. გავაანალიზებთ სიტუაციას, გავაგრძელებთ მუშაობას მარეგულირებელ კომისიასთან და გამოვთქვამთ იმედს, რომ საბოლოო ჯამში იმ შედეგს მივიღებთ, რაც ჩვენთვისაც, კომისიისთვისაც და რაც მთავარია, მომხმარებლისთვის მისაღები იქნება", - განაცხადა მიშა ანთაძემ.
კითხვაზე, ხომ არ ელოდება დედაქალაქის მოსახლეობას გრაფიკი, "თელასის" წარმომადგენელმა აღნიშნა, რომ გრაფიკს არ უნდა ველოდოთ.
მისივე თქმით, დენის ახალი ტარიფი გამოქვეყნებიდან ამოქმედდება და ძალაშია 2016 წლის 31 დეკემბრამდე. "თელასი" სატარიფო განაცხადით სემეკ-ისთვის განმეორებით მიმართვას არ გამორიცხავს.
"თუ ეკონომიკური მდგომარეობა, ვალუტის კურსი შეიცვალა, შეიცვალა ხარჯების შემადგენელი ნაწილები, როგორც ეს აპრილსა და მაისში მოხდა, ჩვენ ამას არ გამოვრიცხავთ", - განაცხადა ანთაძემ.