საქართველოს ეკონომიკისა და მდგრადი განვითარების სამინისტროს, სსიპ ინოვაციების და ტექნოლოგიების სააგენტოს ორგანიზებითა და მოწვეული ექსპერტების მონაწილეობით საქართველოში არსებული სამეცნიერო კვლევითი ინსტიტუტების ინოვაციების და ტექნოლოგიების კომერციალიზაციის პოტენციალის შესწავლა ხორციელდება. პროცესის წარმართვისათვის და კომერციალიზაციის პოტენციალის შესაფასებლად პროექტში მონაწილეობას იღებენ ექსპერტები მასაჩუსეტსის ტექნოლოგიური უნივერსიტეტიდან (MIT).
პროექტი 2 ფაზად არის დაყოფილი. პირველი ფაზა მოიცავს სამეცნიერო-კვლევითი ინსტიტუტების სამეცნიერო-ტექნოლოგიური პოტენციალის, სამეცნიერო ტექნოლოგიური მიღწევების, გამოგონებების, ასევე ტექნიკური ბაზისის აღწერას. პროცესში გროვდება ინფორმაცია სამეცნიერო ტექნოლოგიური მიღწევების პროტოტიპების არსებობის, მათი დახვეწისთვის საჭირო მოწყობილობების თუ პროცესების, თანმდევი თანამშრომლობის სხვა უწყებებთან საჭიროების შესახებ.
პროექტის შემდგომი ფაზა იდენტიფიცირებული პოტენციალის კომერციალიზაციის ანალიზსა და ქვეყნისათვის პერსპექტიული მიმართულების იდენტიფიცირებას მოიცავს.
პროექტის მიზანი საქართველოს სამეცნიერო-ტექნოლოგიური პოტენციალის დადგენა და მისი ეკონომიკის განვითარების პროცესში წილის გაზრდაა. მასაჩუსეტსის ტექნოლოგიური უნივერსიტეტის სპეციალისტები ქართულ მხარეს ასევე არსებული სამეცნიერო-ტექნოლოგიური პოტენციალის საერთაშორისო ბაზარზე წარმოსაჩენად კონტაქტების დამყარებაში და შესაბამისი პარტნიორული ურთიერთობების ჩამოყალიბების პროცესში დაეხმარებიან.
როგორც მოწვეული ექსპერტები აღნიშნავენ, საქართველოს მნიშნელოვანი ინოვაციები გააჩნია საკმაოდ ბევრი მიმართულებით, რომელსაც მსოფლიო ბაზარზე დამკვიდრება შეუძლია.